Priso nga nakaeskapo nasikop og balik

CEBU, Philippines – Usa ka priso sa Asturias Police Station ang nakaeskapo human kini giingong molabay unta og basura apan nasikop pagbalik pipila ka oras nga pagpangita niini diha sa bukirang bahin sa Sitio Tabay Daan Tawo, Barangay Poblacion sa maong lungsod niadtong Miyerkules sa buntag.

Ang maong priso giila nga si Anthony Traso, 22-anyos, nag-atubang og kasong frustrated homicide human kini niunay og suway og patay sa iyang ig-agaw.

Matud ni Police Staff Sergeant Ervin Jugarap, imbestigador sa Asturias Police Station nga molabay unta si Traso ug basura nila sulod sa prisohan ug dihang giablihan ang pultahan nikaratil kini og dagan ug wala na maapsi.

Human sa maong pagsibat ni Traso gipahigayon ang pagpangita niini diha sa panimalay sa iyang ginikanan ug didto nasuta nga nilahos kini sa balay sa iyang apohan nga anaa sa bukid hinungdan nga gisusi ug didto na kini nadakpan nianang pagkahapon sa samang adlaw.

Matud usab ni Jugarap nga si Traso nisulti kanila nga gimingaw sa iyang inahan ug pamilya hinungdan nga niikyas.

Si Traso ang posibleng mag-atubang og laing kaso tungod sa  iyang pag-ikyas. (/BDB)(BANAT NEWS)