Tanod, 4 ka tawo sikop sa buybust

CEBU, Philippines – Barangay tanod ug laing upat ka gipasanginlang durugista ang nasikop sa Drug Enforcement Unit (DEU) sa kapulisan sa Dakbayan sa Talisay niadtong Miyerkules sa hapon sa Sitio Riverside, Barangay Lawaan 3.

Ang subject sa operasyon mao si Eunice Fajardo, 47, nagpuyo sa nahisgutang lugar. Apan sa dihang nahimo na ang transaksyon naabtan sa lugar si Francisco Luage, 58, barangay tanod sa nahisgutang lugar; Maria Flory Mahinay, 31, kapuyo ni Fajardo ug mamaligyaay og puto; Junivie Tabera, 25, ug si Christian Ababon, 29, nga giingong naatlang nipalit sa lugar.

Si Police Captain Nazarino Emia, deputy chief sa Talisay City Police Station nagkanayon nga napanid-an na nila si Fajardo sa iyang ilegal nga kalihukan maong gihimo ang operasyon.

Nakuhaan ang mga dinakpan og shabu nga mitimbang og 16 gramos nga mobalor P108,800. Si Fajardo nihimakak nga namaligya siya og drugas kay siya ug iyang kapuyo puto ra gyud ang negusyo.

Samtang si Luage nga niangkon nga kanhi sakop sa walhong pundok nibutyag nga gi-pick-up lang siya sa mga polis gikan sa iyang pinuy-anan apan giapil siya og dakop.

Si Police Col. Roderick Mariano, direktor sa Cebu Provincial Police Office (CPPO) nipahimangno nga sugod pa lang ni sa paghingusog sa kampanya batok ginadiling drugas diha sa maong dakbayan. (/IBM)(BANAT NEWS)