Gikan sa korte gipatay

CEBU, Philippines – Patay ang usa ka 53- anyos nga lalaki human kini gipusil samtang nagkuyog sa iyang asawa ug apo nga babaye gikan sa Mandaue Hall of Justice diha sa may Mantawe Road, Barangay Tipolo, Dakbayan sa Mandaue kagahapon sa hapon,.

Ang nakalas naila nga si Teodoro Mejares, 53, pintor, taga Hiltop Casili Lungsod sa Consolacion.

Matud pa ni Gina Mejares, asawa sa biktima napriso ang iyang bana tungod sa kasong illegal possession of firearms human kini nadakpan sa mga sakop sa Criminal Investigation and Detection Group-7 niadtong tuig 2017.

Dugang pa ni Mejares, gikan sila sa hearing sa Branch 56 tungod sa maong kaso ug padulong na sila mouli sa dihang nakabiya sila sa korte 50 metros ang gilay-on kuyog sa iyang bana ug apo nga babaye didto gipusil iyang bana sa riding in tandem ug ang angkas maoy nibira.

Ang asawa nitug-an nihangyo pa ang bana niini nga dili siya patyon apan gitiwasan kini sa ulo. Ang asawa nitug-an wala siya makadawat nga adunay hulga ang iyang bana nga nadawat.

Samtang si Police Staff Sergeant Frederick Andales, imbestigador sa maong kaso mibutyag nga ila pang subayon kun unsay motibo sa pagpatay sa biktima. (Rowena D. Capistrano/IBM)

Natulog gidunggab patay

Patay ang usa ka 27-anyos nga lalaki human kini gidunggab samtang natulog sa ilang panimalay sa may Barangay Banhigan, Lungsod sa Dalaguete Miyerkules sa kaadlawon.

Ang nakalas naila nga si Dindo Ramos, residente sa maong lugar, samtang ang gitumbok nga nagpatay kaniya mao si Rey Anthony Carumbana, 39,  silingan sa biktima.

Matud pa ni Police Master Sergeant Arnold Frenal, desk officer sa Dalaguete Police Station, base sa inisyal nga imbestigasyon natulog ang biktima sa dihang kalit niabot ang suspetsado ug didto niini gidunggab si Ramos sulod sa tulo ka higayon ug daling nibiya sa lugar.

Sumala pa ni Frenal, naabtan pa nila si Carumbana nga gitudlong maoy nagdunggab sa biktima maong ila kining gidakop. Gidala sa tambalanan ang biktima apan patay na kini.

Personal nga bangi ang gitan-aw nga motibo sa maong krimen. (/IBM)(BANAT NEWS)