Barko nasunog, apprentice naangol

CEBU, Philippines – Naangol ang usa ka tripolante sa MV Trans Asia 1 sa Trans Asia Shipping Lines dihang nisilaob ang kayo samtang nag-angkorahe kini sa Pier 8 sa FF Cruz Wharf sa Reclamation Area, Subangdaku, Dakbayan sa Mandaue alas 3:48 kagahapon sa kaadlawon.

Giila ang naangol nga usa sa mga apprentice mates sa maong barko nga si Gleen Ligit kinsa dali nga gidala sa University of Cebu Medical Center sa maong dakbayan human nakaangkon og minor injury sa ulo.

Ang Philippine Coast Guard-Central Visayas nakadawat og tawag may kalabutan sa maong sunog hinungdan nga dali kining girespondehan uban ang CG Special Operations Team, Medical ug Coast Guard Environmental Protection Unit.

Si Lieutenant Junior Grade Michael John Encina, tigpamaba sa PCG-Central Visayas, niingon nga base sa ilang pasiuna nga pagsusi ilang nasayran nga ang hinungdan sa pag-ulbo sa kayo mao ang faulty electrical wiring sa gallery sa maong barko.

Hingpit nga gideklarar nga nakontrolar ang kayo alas 6 na ang takna kagahapon sa buntag.

Sumala pa ni Encina nga ang maong barko nga adunay sakay nga 36 ka crew ang wala nay pasahero dihang nahitabo ang kalit nga pag-ulbo sa kayo samtang ang kapitan mao si Captain Keneth Oyangorin

Si Encina niingon nga ang mga sakop sa PCG Environmental Protection Unit ang naghimo usab og pakisusi sa kadagatan sa maong lugar ug ilang nasuta nga walay oil spill nga nahitabo.

Ang sunog giingong nagsugod sa gallery air blower sa barko.

Dugang ni Encina nga padayon pa ang gihimo karon nga imbestigasyon may kalabutan sa nasunog nga barko.

“Pre-assessment initial cause of incident is faulty electrical wiring located at the galley,” sigun ni Encina. (Camille L. Pateres/GMR)(BANAT NEWS)