2-anyos gi-sex online

CEBU, Philippines – Nagtingkagol sa prisohan ang gikatahong online sex trafficker nga German samtang na-rescue ang 2-anyos nga Filipino-German nga anak niini nga lakip sa iyang gibaligya sa online.

Pinasikad sa search warrant nga giluwatan sa korte, naronda sa mga sakop sa Women and Children’s Protection Center-Visayas Field Unit ang panimalay sa langyaw sa Dakbayan sa Lapu-Lapu.

Gitago una ang pangalan sa suspek aron maproteksyonan sab ang anak niini.

Matud pa sa International Justice Mission nga natumbok ang langyaw nga online trafficker human na-rescue sa mga awtoridad ang duha ka managsuong 6 ug 7-anyos sa niaging semana.

Ang hepe sa Regional Women’s and Children’s Protection Center nga si Police Colonel Romeo Perigo nagkanayon nga wala pa matumbok nila kun aduna bay kasayuran o kalabutan ang Pinay nga inahan sa bata.

“Pag-serve namo sa warrant, naa didto ang inahan pero ang iyang ingon kay wala na daw siya nagpuyo didto,” matud ni Perigo.

Giingong wala pa sab silay igong ebidensya nga adunay kalabutan ang maong Pinay. (/GMR)(BANAT NEWS)