Tsuper Iskolar

Mao kini ang programa nga gilusad sa Department of Transportation DOTr ug sa Technical Education Skills Development Authority TESDA alang sa mga drivers ug operators sa mga public utility vehicles nga maapektohan sa PUV Modernization program.

Gidagsa kini sa mga mga sakop sa nagkadaiyang transport groups sa Metro Cebu atol sa launching niini didto sa IC3 niadtong Biernes.

Matod ni Chairman Martin Delgra sa Land Transporta-tion Franchising Regulatory Board LTFRB nga ang Tsuper Iskolar gitumong sa pagpalambo sa katakos sa mga drivers sa pagsagop sa kabag-ohan nga gikinahanglan nang ipatuman sa kagamhanan.

Naglakip na niini kon unsaon sa pagdumala sa programa nga gipahaum sa modernization sa mga pampublikong sakyanan.

Apan alang niadtong dili gustong mo avail sa Tsuper Iskolar hatagan usag nila og alternatibong pagbansay nga magamit sa pilion nga panikaysikay o livelihood nga sudlan.

Ang TESDA na ang bahala sa naasoyng abag alang sa mga maapektohan nga mga nahilakip sa transport sector.

Ang programa adunay gahin nga 350 million pesos nationwide ug ang Sugbo maoy kataposan nga dapit alang sa maong programa.

Samtang gihangop man sa transport group ang inisyatiba sa kagamhanan apan aduna gihapoy pagduha duha ang uban.

Matod ni Greg Perez sa PISTON nga padayon nilang supakon ang tinguha sa gobierno nga wagtangon na sa kadalanan ang mga karaang jeepney.

Kini tungod kay mao ra kini ang gisaligan sa mga gagmayng operator ug driver kinsa dili ka afford nga mosabay sa modernization.

Ang pangutanan duna pa bay mahimo ang pagsupak nila?

Pursegido ang gobierno nga ipatuman ang modernization busa karon pa lang dawaton nalang ang kamatooran nga mapatuman na ang kabag-ohan. Unta sa Tsuper Iskolar program mahatagan og hayag nga kahigayonan ang mga maapektohan nga makapalambo sa ilang katakos nga magamit nila sa bag-ong dalan nga ilang subayon, gikan sa naandan ngadto sa kabag ohan nga mao ang modenization sa transportasyon nga maoy gitan aw nga solusyon sa problema sa trapiko.