Conag sa PIB; Carag sa Talisay
CEBU, Philippines – Gipahibawo sa direktor sa Cebu Provincial Police Office nga si Police Colonel Roderick Mariano nga ibalhin niya ang hepe sa Talisay City Police Station aron mahimong hepe sa Provincial Intelligence Branch (PIB).
Giingong epektibo niadtong Lunes human migawas ang order gikan sa Police Regional Office-7 nga mapun-an sila og usa ka bag-ong opisyal.
Nunot niini, ang hepe sa kapolisan sa Talisay nga si Police Lieutenant Colonel Marlu Conag mao nay hepe sa PIB. Kahinumduman nga ilisdan ang karaang PIB gumikan sa giingong ‘misencounter’ ug ‘miscoordination’ sa usa ka operasyon sa Brgy. Sinsin, Cebu City diin adunay polis nga namatay.
Si Conag pulihan ni Police Major Orlando Carag Jr., staff sa PRO-7.
Deriktiba ni Mariano kang Carag nga mas hingusgan pa ang kampanya kontra drugas sa Talisay.
Subay niini, walay problema si Mayor Samsam Gullas sa umaabot nga bag-ong hepe sa kapolisan sa Talisay. Gani, wala siya mihangyo nga ilisan si Conag kay kontento siya sa agi niini apan mao man kini ang higayon nga mosaka sila sa ilang posisyon hinungdan nga iya kining girespeto.
Giasoy ni Gullas nga niadtong miaging adlaw, nagkita na sila ni Carag ug gipaabot niya ang iyang suporta niini. Iyang hangyo nga ipadayon ang nasugdan ug mohimo pa og lakang nga maprotektahan ang Talisaynon sa mga dautang elemento sa katilingban. (Gabriel C. Bonjoc/DILT)(BANAT NEWS)
- Latest