6 ka bokal ra ang nanambong
CEBU, Philippines – Sa ika-tulong higayon, wala motambong ang kasagarang mga bokal sa umaabot nga ika-15 nga Sangguniang Panlalawigan aron unta hisgutan ang Internal Rules of Procedures (IRP)
Sa 17 ka miyembro sa Hunta Probinsiyal, pito lang ang mitambong apil na niini ang umaabot Bise Gobernador Hilario “Junjun” Davide III. Matud ni provincial secretary Atty. Pulchra Marie Acevedo, nga kasagaran sa mga bokal wala mokumpirmar kon sila motambong.
Ang uban adunay gitambungan nga laing kalihukan sama ni bokal Jimbo Borgonia kinsa nanumpa sa Lungsod sa Pinamungajan. Si bokal Glenn Soco, nag-out of town, samtang si bokal Christopher “Dong” Baricuatro adunay giatiman nga “domestic concern”.
Ang nakatambong mao sila si bokal Jose Marie Salvador, SK Federation president Jerico Rubio; Jerome Librando; Miguel Magpale; Victoria “Tata” Corominas-Toribio ug Raul Bacaltos.
Hangtud karon wala pay IRP ang umaabot nga SP. Hinuon matud ni Acevedo nga wala kini epekto sa tahas sa mga bokal.
Dugang niya nga mahimo ra usab nga atol sa inaugural session karong Hulyo 1 o 90 ka adlaw gikan niana, maka-desisyon ang SP nga mo-adopt o mo-update sa IRP.
Atol sa unang adlaw sa regular session sa 15th SP, anaa sa agenda ang adoption ug approval sa internal rules lakip na usab sa election ug appointment sa mga chairman ug sakop nga bokal sa mga standing committee sa provincial board.
Gibutyag ni Acevedo nga posibleng malangay o madugay ang pagtuki sa chairmanship sa mga komitiba kay wala man kini daan masabuti sa mga bokal. (/DILT)(BANAT NEWS)
- Latest
