Labella gidayeg ni Ong

CEBU, Philippines – Sa gipahigayon nga second quarterly assembly sa Liga Ng Mga Barangay nga gipahigayon sa usa sa mga hotel sa Dakbayan sa Sugbo kagahapon, nagkatinubagay sila si Association of Barangay Councils (ABC) president Franklyn Ong ug Mambaling Barangay Captain Gines Abellana.

Hinungdan niini mao ang monobloc chairs nga gipanghatag sa ABC ngadto sa 80 ka barangay sa dakbayan.

Si Abellana miasoy nga ang Mambaling gipahibawo labot niini ug dihang giadto sa iyang mga tawo, giingong gibalibaran kini ug midugang nga ang maong mga lingkuranan gi-deliver sa balay ni Konsehal Anne Marie Vestil Palomo kinsa nahimong acting Barangay Captain dihang nasuspenso si Abellana.

Mibahad si Abellana nga kon dili ma-deliver sa barangay ang mga lingkuranan pasakaan niya og kaso sila si Palomo ug Ong.

Apan si Ong miklaro nga wala nila gi-deliver ang maong mga lingkuranan ug adunay representante ang barangay nga mikuha niini gani aduna silay gihuptan nga ebidensiya pagpamatuod nga kini gikuha ug wala gihatod.

Sa pangangkon ni Abellana nga anaa sa balay ni Palomo ang mga lingkuranan kini miasoy nga ang kapitan angay mohimo og lakang labot niini kay ila na kining problema sa konsehal.

Subay niini, gihangop ni Ong ang plano ni Mayor-elect Edgardo Labella nga unahon niini ang problema sa basura ug baha sa siyudad sa iyang first 100 days.

Matud ni Ong nga usa kini ka maayong lakang ni Labella kay problema gyud karon kon unsaon pagsustiner sa garbage collection ilabi na nga nagsige na og uwan ug lauman nga mga pagbaha.

Alang sab sa ABC president nga usa ka welcome development ang tinguha sa umaabot mayor nga makigtagbo sa kapitan nga dili magtan-aw kon asang partido kini nahisakop dungan sa pagbutyag nga silang mga kapitan makig-alayon sa mayor alang sa kalambuan sa tanang barangay sa siyudad.

Ipadangat usab ni Ong ngadto kang Labella nga unta tabangan sila sa fuel allocation ug maintenance sa mga sakyanan nga gi-donate sa siyudad sa kabarangayan. (/DILT)(BANAT NEWS)