Oath taking sa Barug-PDP sa Hunyo 30

CEBU, Philippines — Pasidunggan sa konseho sa Siyudad sa Sugbo ang ilang mga sakop kinsa matapos sa ilang pagserbisyo atol sa ilang katapusang sesyon karong adlawa.

Kini naglangkub nilang Konsehal Margarita Osmeña, Mary Ann delos Santos, Joel Garganera, Jose Daluz III, Jerry Guardo, James Anthony Cuenco, Pastor Alcover Jr. ug Jocelyn Pesquera.

Samtang gipahibawo ni Mayor-elect Edgardo Labella nga final na nga karong Hunyo 30 ang oath taking sa mga kandidato sa Partido Barug PDP-Laban atubangan ni Supreme Court Justice Amy Lazato Javier.

Gihulagway ni Labella nga simply lang ang oath taking nga sugdan sa Santos nga Misa sa alas 10 sa buntag ug human sa pagpanumpa sa mga konsehal, bise mayor ug mayor, mohatag dayon og mubo nga mensahe si Labella.

Daghan sila og giimbitar nga mga bisita ug bukas sab alang sa mga supporters sa Partido Barug PDP-Laban ang kalihukan nga ipahigayon sa Plaza Sugbo.

“Because that’s of course the last day, mo-take effective ang atong paglingkod on noontime of June 30 and it’s Sunday, everybody will have some time to attend,” sigun ni Labella. (BANAT NEWS)