Babaye gihapon ang mohulip ni Garma?
CEBU, Philippines — Police Regional Office 7 Regional Director Police Brigadier General Debold Sinas, malaumon nga babaye gihapon ang mohulip ni Police Colonel Royina Garma, isip Cebu City Director sa Cebu City Police Office.
Si Garma giingong mao nay umaabot nga general Manager sa Philippine Charity Sweepstake Office kon PCSO.
Matud pa ni Sinas, nagsagol ang iyang gibati sa pagbiya ni Garma kinsa kapin tuig nga nagsilbing director sa CCPO apan nalipay gihapon siya kay nasayod siyang motan-aw pag-usab si Garma sa panginahanglanon sa kapulisan.
Sumala pa ni Sinas mas pabor siya kung babaye ang mohulip ni Garma, kay ligdong ang mga baruganan ug limpyo usab ang mga police stations lakip usab ang maayo nga management.
Si Garma sa iyang bahin miingon nga usa ka dakong dungog para niya nga nakaserbisyo sa dakbayan bisan pa man sa mga hagit ug pagsuway nga iyang giatubang.
Masaligon si Garma nga padayonon gihapon sa mohulip kaniya ang pagpasaka sa morale sa kapulisan sa CCPO. Malaumon sab siyang ang bag-ong molingkod nga mayor motabang sa kapolisan. (BANAT NEWS)
- Latest
