Sakop sa CCTO nadakpan sa buy-bust

CEBU, Philippines — Duha ka sakop sa Cebu City Transportation Office lakip nga nasikop sa gihimong buy-bust operation sa mga tinugyanan sa Waterfront Police Station sa may Sitio Zapanta, McArthur Blvd. sa Brgy. Tejero alas 11:55 sa gabii niadtong Miyerkules.

Ang nadakpan mao sila si Eric Navarro, 38-anyos, Traffic Aide I, taga Sitio Tugas, Brgy. Inayawan ug si Francis Mordeno, 40-anyos, Traffic Aide I nga taga M.J. Cuenco Ave., sa Brgy. T. Padilla. Kauban nilang nasikop mao  sila Reynaldo Ricarte, alyas Pawpaw, 29-anyos residente sa dapit ug si Mark Miñosa, 39-anyos, taga Brgy. Apas.

Si Police Major Joemar Pomarejos nga maoy nangulo sa operasyon sa pakig-alayon sa mga tinugyanan sa Philippine Drug Enforcement Agency (PDEA-7) miingon nga nakadawat sila og kasayuran labot sa ilegal nga drugas sa lugar hinungdan sa ilang gihimo nga beripikasyon hangtud nga nahimo ang buy-bust operation dii nasikop ang mga dinakpan. Miabot sa 19 ka putos sa ginadiling drugas nasakmit gikan sa mga dinakpan nga motimbang og lima ka gramos ug mobalor og P34 mil, apil na ang mga drug paraphernalia.

Samtang nadakpan sab ang 22-anyos nga si Kevin Vaflor Candole, taga Sitio Grutto sa Brgy. Apas.

Nakuhaan kini og upat ka gagmayng pakete sa gituohang shabu ug buy-bust money.  Ingon man kalibre 38 nga pistol nga adunay duha ka bala. Ang mga sakop sa PDEA-7 ug Mabolo Police Station maoy mipahigayon sa maong operasyon. 

Ang mga dinakpan nagtingkagol na karon sa lock-up jail samtang gipaabot ang pagpasang-at og tukma nga kaso batok kanila. (Jezebel G. Braulio, CNU Intern/DILT) (BANAT NEWS)