Nagbanhig sa negosyante nakuhaan sa CCTV

CEBU, Philippines – Ang kapolisan sa Dakbayan sa Mandaue wala pay matumbok nga person of interest sa mibanhig-patay sa magpapatigayon nga insik nga si Yi Feng Gou Yang, ug miangol sa duha niya ka mga anak dihang paingon na unta silang mamauli sa ilang panimay sa may Brgy. Cubacub niadtong sa Domingo sa gabii.

Asoy ni Mandaue City Police Office director Police Col. Julian Entoma nga padayon ang ilang imbestigasyon kon unsay motibo krimen.

Gani, padayon pa ang ilang follow-up operation sa pagtino kon robbery ba ang kaso, kay kon mao kini, nan mahimo nga ang mga person of interest ang mga trabahante sa maong negosyante.

Giklaro ni Entoma nga ang person of interest, wala magpasabot nga mao na ang suspek kay ipaubos pa man kini sa imbestigasyon. Subay niini, nanghipos na karon ang Presinto 6 sa MCPO og mga kuha sa CCTV cameras nga anaa sa barangay hall sa Cubacub aron masusi sa crime laboratory kon nakuha ba niini ang mga panagway sa mga mipusil sa negosyanteng insik. Dugang isumitir sa mga imbestigador ang cellular phone sa biktima alang sa pagsusi sa mga nadawat niini nga mga mensahe sa wala pa mahitabo ang krimen.

Nasayran nga basi sa pasiunang pakisusi sa kapolisan, ilang nasuta nga duha ka mga lalaki  nga nagsakay og motorsiklo nga nag-una sa L-300 van nga gimaneho sa biktima. Nagsunod  usab ang laing motorsiklo nga giluwanan sa laing duha ka mga lalaki nga nagsunod sa van.

Matud ni Entoma nga dihang naabot sa lugar nga nahimutang mga 70 metros gikan sa barangay hall sa kurbadahon nga bahin, gipamusil ang mga biktima.

Nagtuo ang kapolisan nga gisentro sa pagpusil sa mga mamumuno ang  amahan nga nagmaneho sa sakyanan. Gawas sa robbery, anggulo sa negosyo ang gisuta usab karon sa mga imbestigador nga maoy hinungdan sa pagpamanhig. (Rowena D. Capistrano/DILT)(BANAT NEWS)