PDEA-7: Strawberry Quick wa pa kasulod sa Pilipinas
CEBU, Philippines – Bag-o nga matang sa illegal nga drugas nga gitawag og Strawberry Quick diin susama ra og candy giingong wala pa nakasulod sa nasud sukwahi sa mikatap sa social media diin giingong nakalusot kini sa Bureau of Customs ug sa Philippine Drug Enforcement Agency-7.
“Amo lang i-assure ang public, especially ang mga ginikanan nga wala pa tay na-seized or nasakmit nga ingun ani nga klase sa drogas. Wala pay nakasulod diri sa nasud apan dili lang ta mokompiyansa,” sigun sa tigpamaba sa PDEA-7 nga si Leia Albiar-Alcantara.
Ang Strawberry Quick usa ka crystal meth diin giingong susama ra og candy diin lain-lain kini og color, humot nga strawberry ug mag-pop kun isulod sa baba.
Bisan pa man og giingong wala pa kini makasulod sa Pilipinas, giawhag sa maong tigpamaba ang publiko ilabi na ang mga ginikanan sa pagmonitor sa ilang mga anak.
Matud niya dako ang posibilidad nga targeton ang mga tunghaan sa mga tigpahuyot og klase-klase nga matang sa illegal nga drugas.
Tug-an ni Alcantara nga lakip kini sa hisgotan sa ilang kampanya sa drug education ngadto sa mga tunghaan ug mga barangay.
“Sa atong campaign against illegal drugs, naa tay supply reduction and demand reduction, ang demand reduction hasta ang mga ginikanan i-educate aron sila maoy morelay sa ilang mga anak,” dugang sa tigpamaba.
Nasayran nga diri sa Sugbo, usa ka 19-anyos nga batan-ong babaye na ang namatay sa drug overdose gamit ang party drug nga ecstasy atol sa konsiyerto diha sa Cebu Business Park niadtong Sinulog week, Enero 26 karong tuiga.
Sa pikas bahin, tulo ka tawo ang nadakpan sa managlahing buy bust operations sa mga sakop sa City Drug Enforcement Unit (CDEU) sa Lapu-Lapu City Police Office (LLCPO) .
Ang mga nadakpan sa Barangay Bankal mao sila si Lester Linao Ylaya, alyas Kakang, 38, ug Gerry Senerpida Casio, 27, nga nakuhaan og 16 ka gagmay nga paketeng shabu.
Samtang nadakpan sa taga Presinto 4 si Supersito Labajo Estrada alyas “Super”, 43, diha sa Sitio Ube, Brgy. Gun-ob ug nakuhaan kini og pito ka putos nga gidudahang shabu. (Romeo Limpangog/IBM)(BANAT NEWS)
- Latest
