Unom sikop sa managlahing drug operations

CEBU, Philippines — Nasikop ang duha ka suspetsadong drug pusher atol gipahigayong buy bust operation sa kapolisan sa Pardo Police Station niadtong Biyernes sa buntag diha sa Sitio Ipil-Ipil, Alaska, Barangay Mambaling, Dakbayan sa Sugbo.

Giila ang duha nga si Jeric Cabanilla Marangay, 23-anyos nga taga Sitio Belgium Barangay Suba, Dakbayan sa Sugbo ug Evangeline Sabal Mijares, 39-anyos nagpuyo sa  maong lugar.

Nasakmit sa kapolisan gikan sa mga suspetsado ang siyam ka paketeng shabu nga gisulod sa usa ka itom nga bulseta nga motimbang og 100 ka gramos ug nibalor ngadto  sa P680 mil base sa dangerous drug board value ug buy bust money.

Si Marangay ug Mijares ang natingkagol diha sa detention cell sa Pardo Police Station.

Sa laing bahin, upat ka suspetsadong drug pusher ang nasikop sa buy bust operation sa managlahing takna ug dapit sa Lungsod sa Cordova.

Nasikop nila ni Police Captain Efren Diaz, Jr., hepe sa Cordova Police Station si Ivy Osis, 28, taga Barangay Catarman sa maong lungsod.

Si Osis nadakpan pinaagi sa warrant of arrest nga giluwatan ni Judge Lucila Cademjambre sa Regional Trial Court (RTC) Branch 89.

Giingong si Osis ang nasakmitan og usa ka medium nga pakete ug unom ka gagmay nga pakete nga shabu nga mokabat sa P11,424  ang kantidad base usab sa  Dangerous Drugs Board (DDB) value.

Laing nadakpan diha sa Barangay  Dapitan sa mao gihapong lungsod sila si Mario Yburan, 48, Ronelio Ligan, 38 ug  Rodel Ligan, 33, pulos nagpuyo sa maong dapit ug nasakmit gikan kanila ang shabu nga nagkantidad ngadto sa P1,224.

Samtang sa Sitio Haginit, Barangay Managase, Lungsod sa Borbon nadakpan sa kapolisan ang suspetsadong drug pusher nga si Anthony Casas Tulod, 20-anyos, taga Sitio Bayanihan, Barangay Managase.

Giingong nasakmit gikan kang Tulod ang lima ka gagmay nga paketeng shabu nga nagkantidad og P1,020. ug P300 nga buy bust money. (Romeo T. Limpangog/BDB)(BANATNEWS)