Nagmotor na-slide tungod sa uwan napasok sa SUV

CEBU, Philippines – Patay diha-diha dayon ang usa ka manindahay og sud-an nga nagmaneho sa iyang motorsiklo human siya napasok sa SUV nga iyang gikasugat sa Barangay Lawaan 1, Dakbayan sa Talisay kagahapon sa alas 5 sa kaadlawon.

Ang biktima mao si Melvin Cañada, nagpuyo sa Sitio San Miguel, Barangay Linao sa nahisgutang siyudad.

Samtang ang nagmaneho sa Sports Utility Vehicle (SUV) mao si Elmer Tangaro, 30, taga Jakosalem St., Barangay Day-as, sa Syudad sa Sugbo. Matud pa ni Patrolman Aries Araoarao sa Talisay City Traffic Division nga padung sa habagatan si Tangaro samtang paingon sa Barangay Tabunok si Cañada aron mangumpra alang sa ipaninda niining mga sud-an.

Apan pag-abot sa nahisgutang lugar kalit lang nga na-slide ug natumba ang motor ni Cañada ug napunta kini sa pikas nga linya nga gisubay ni Tangaro ug napasok ang biktima sa ilawom ug naguroy pa og pipila ka metros.

Nasuta nga basa kaayo ang karsada nianang tungora tungod kay nagsige og uwan hinungdan nga dangog ang karsadang gisubay sa biktima,

Nakita sab sa CCTV camera sa Barangay Lawaan 1 ang maong aksidente. Matud pa nga dili maayo pagkapatag ug daw bawod-bawod ang aspalto sa maong dalan ug maoy gituohang nakapatumba sa namatay.

Si Tangaro ang nitahan dayon sa iyang kaugalingon sa mga otoridad ug gibalhug sa bilangguan samtang nagpaabot nga pasakaan og kaso. (Rose Carmel De la Cerna/IBM)(BANAT NEWS)