CPH sa Carcar adunay bag-ong CT scan

CEBU, Philippines — Subay sa tinguha nga ma-upgrade ang 16 ka provincial ug district hospital sa Probinsiya sa Sugbo, ang Kapitolyo nipalit kini og bag-ong medical equipment.

Ang Cebu Provincial Hospital (CPH) sa Dakbayan sa Carcar aduna nay bag-ong Computerized Tomography (CT) scan.

Ang P23 milyones nga ekipo gitugyan ni ngadto sa tambalanan niadtong niaging semana gipangulohan ni outgoing governor Hilario Davide, III kinsa nagkanayon nga dako ang tabang sa maong ekipo alang sa mga kabus nga pasyente sa habagatan.

Giingong pinaagi sa maong CT Scan dili na kinahanglan mobiyahe pa sa Dakbayan sa Sugbo ang mga pasyente aron magpa-CT Scan.

Matud ni Davide nga tinguha nila nga makapalit usab og susamang ekipo alang sa ubang tambalanan sa probinsiya sama sa CPH Bogo, Balamban ug Danao nga kasamtangang gi-upgrade sa Kapitolyo pinaagi sa Provincial Health Office (PHO). (Le Phyllis F. Antojado/BDB)

Davide manumpa  kang Magpale

Gipili ni incoming vice governor Hilario Davide, III si outgoing vice governor Agnes Magpale nga maoy mo-administer sa iyang pagpanumpa isip ikaduha sa pinakataas nga opisyal sa Kapitolyo.

Si Davide gikatakda nga manumpa  karong Hunyo 30, isip bise gobernador sa Lalawigan sa Sugbo. Matud ni Davide nga siya ang nihangyo kang Magpale nga maoy mo-administer sa iyang pagpanumpa. Si Magpale ang nisanong usab sa maong hangyo ni Davide.

Si Magpale ug Davide maoy tandem sa nilabay’ng midterm election kinsa si Davide ang nidaog batok sa iyang kaatbang nga si Daphne Salimbangon apan si Magpale ang napildi ni incoming governor Gwendolyn Garcia.

Si Davide gikatakdang mo-turnover sa administrasyon sa Kapitolyo ngadto kang Garcia karong Hunyo 28.

Ug sa Hulyo 1, sugdan na usab ni Davide ang bag-o niyang katungdanan isip bise gobernador diin siya usab ang presiding officer sa 15th Sangguniang Panlalawigan. (/BDB)(BANATNEWS)