Tomas ug Edgardo naglamanohay

CEBU, Philippines — Gipakita nila ni Cebu City outgoing Mayor Tomas Osmeña ug Mayor-elect Edgardo Labella ang tinud-anay nga kahulogan sa kaugalingnan pinaagi sa pagpakita nila og maayong taras sa usag-usa.

Kagahapon, gisaulog sa nasud ang ika-121 nga Independence Day diin adunay kalihukan ang kagamhanan sa siyudad nga gitambungan nila ni Osmeña, Labella, mga Konsehales ug empleyado sa City Hall.

Dihang namulong si Osmeña, gitimbaya niini si Labella, diin sa iyang mensahe iyang gipaabot ang kamahinungdanon sa kagawasan nga naangkon karon. Human sa paghatag og mensahe sa outgoing mayor, naglamanohay ang duha.

Gidayeg ni Labella ang gipakitang lihok ni Osmeña kay kahinumduman nga dihang naghinangat ang piniliay, silang duha nagbinayloay og mahait nga mga pulong diha sa ilang tagsa-tagsa ka official Facebook page. (/DILT)(BANATNEWS)