Bato: Narco, ninja cop angay bitayon

CEBU, Philippines – Nanghagit si Senator-elect Ronald “Bato” Dela Rosa og usa ka tuig nga debate sa iyang mga kritiko.

Kagahapon niabot sa Sugbo ang retiradong heneral ug nakigkita sa iyang mga supporters aron pasalamatan sa iyang kadaugan sa niaging eleksyon.

Atol sa press conference, padayag ni Dela Rosa nga gidaug-daug siya sa iyang mga kritiko sanglit usa siya ka yanong Bisaya.

“Kinsa kanang mga tawhana iatubang kanako debatehon nako sila bisag usa ka tuig pa, kung moingon sila nga way sulod ang akong utok, debate ta may’ng laki man kaha mo,” sigun niini.

“Porke Bisaya ta daug-daugon lang tong mga Tagalog, wa pa koy nadunggan nga Bisaya nga nagdaug-daug sa akoa,” dugang sa bag-ong Senador.

Plano ni Dela Rosa ang pagduso og balaud diin bitayon ang mga narco cop ug ninja cop sa nasud.

“Kun adunay bitay para sa mga drug traffickers, dapat naa poy bitay para sa mga polis nga nagatanum og ebidensya, dapat mabitay pud na,” sigun ni Dela Rosa.

Giangkon sa Senador nga grabe gihapon ang problema sa drugas maong plano niya ang paghimo og hiniusang kampanya batok sa ilegal nga drugas lukop nasud.

Si Dela Rosa unang nisibaw ang iyang pangalan dihang gitudlo kini ni Presidente Rodrigo Duterte isip pangulo sa Philippine National Police (PNP) ug gipasiugdahan ang Operation Tuktok Hangyo nga naila nga Oplan Tokhang.

Kini niresulta sa pag-surender sa mga tiggamitan sa ilegal nga drugas ug daghan sab ang nangamatay kinsa giingong nisukol sa mga operasyon sa kapolisan.

Samtang gihimug-atan sa Department of Education sa Siyudad sa Talisay ang pagpahinumdum sa mga tinun-an nga likayan ang ginadiling drugas gumikan sa ka walay maayong kapaingnan niini.

Si Dr. Arden Monisit, city schools division superintendent, nibutyag nga samtang hugot ang kampanya sa kapolisan sa ginadiling drugas, target sa ilang departamento ang paglimpyo sa huna-huna sa kabataan labot sa epekto sa ilegal nga drugas.

Matud niya nga gi-incorporate na nila sa ilang drug awareness program ang pagtutok niini samtang target sab sa mga student organization ang matang sa programa.

Si Monisit niingon nga mas maayo nga sa sulod sa lawak saringan gipahibawo nang daan ang kabataan labot sa bisan unsang epekto sa lawas sa tawo ang paggamit og drugas.

Siya nitataw nga uban sa kapolisan, ilang matabangan ang maong programa aron paagi niini dili na dali nga magalgal ang kabataan nga mosulod sa matang nga bisyo.

Ila sab gidapit ang mga awtoridad nga sila sab mismo maoy mahimo nilang resource speaker panahon nga adunay symposium.

Sa nasayran ang kapolisan nipaduol sa kabataan sa Dakbayan sa Talisay pinaagi sa paghatag og mga sports equipment, paghatag og tabang sa kabus nga kabataan ingon man pagpintal sa mga lawak saringan nga gipanghugaw-hugawan. (Romeo T.  Limpangog ug Gabriel C. Bonjoc/GMR)(BANAT NEWS)