Duha sikop sa buybust; siyam sa checkpoint

CEBU, Philippines — Nasikop ang duha ka tawo sa gihimong buybust operation sa Consolacion Police Station ug laing siyam usab ang  nadakpan sa checkpoint nga gihimo sa Presinto 1 sa Mandaue City Police Office (MCPO) nga maoy hinungdan sa pagkasakmit sa P270 mil nga kantidad sa gituohang  shabu basi sa Dangerous Drug  Board value. Mihimo og operasyon ang kapolisan sa Consolacion sa Purok 5, Brgy. Nangka kagahapon sa kadlawon diin matud ni Police Corporal Niño Barabad, ilang nasikop sila si Alexander  Echavez, 29-anyos, taga Ibabao Estancia sa Dakbayan sa Mandaue ug Rustom Bentulan, 35-anyos nga taga Brgy. Umapad sa mao gihapong dakbayan.

Matud ni Barabad nga gipangulohan sa ilang hepe nga si Police Major Gerard  Ace Perale ang operasyon diin ilang nasakmit gikan sa mga suspek ang napulo ka gagmayng pakete sa gituohang shabu, P700 nga gituohang halin ug P500 nga buybust money.

Samtang sa A. Soriano Ave. sa Brgy. Centro sa Dakbayan sa Mandaue miaging gabii ang kapolisan sa Presinto 1 nga gipangulohan sa ilang hepe nga si Police Major Aldrin Villacampa, nakasikop og siyam ka motorista nga nagdala og gidudahang shabu. Si  Police Master  Sergeant Arthur Cuyos sa Presinto 1 sa  MCPO miila sa ilang mga dinakpan nga sila si John Jeffrey Montayre, 31-anyos ug ang managsuong Kim ug Joseph Brigoli nga pulos taga Sogod, Cebu.

Nadakpan usab sila si Kiven Elrio ug Remley Quiveno, pulos taga Lungsod sa Cordova; Rodrigo Ignacio, taga Dakbayan sa Lapu-Lapu, Robert Bueda, taga Dakbayan sa Bogo, Debie Ortelio, taga Umapad, Dakbayan sa Mandaue, Byla Mark  Alarmedon, ug Anthony Boquecosa, nga pulos taga Dakbayan sa Lapu-Lapu. Dugang pa ni Cuyos nga ilang nasakmit ang 25 nga kinatibuk-ang gidaghanon sa pakete sa gituohang shabu ug ingon man mga drug parapahernalia gikan sa mga dinakpan nga kasamtangan karong gitanggong sa detention cell. (Romeo T.  Limpangog/DILT)

Mibanhig kang Bontuyan padayong giila

Suspek sa pagpusil patay kang Police Captain Delfin Bontuyan nagpabiling gawasnon ug wala gihapon mailhi sa mga imbestigador.

Ang imbestigador sa maong kaso nga si Police Chief Master Sergeant Antonio Din miingo nga sa pagkakaron ang dashboard camera sa taxi nga nakatapad ni Bontuyan maoy gisaligan nila nga makakuha og hulagway sa mga mamumuno.

Asoy ni Din nga sa mga nakuha nila nga mga CCTV footage sa lugar, dili maklaro ang mga nawong niini.

“Sa dash cam basin makita ang nawong sa usa kay nagkalo ra man wala man naghelmet,” butyag niini.

Naghuwat na lang sila nga iluwat kini sa PNP Cybercrime group, kinsa maoy niproseso sa maong footage.

Giingong ang tulo ka mga mamumuno nagsul-ob og full faced helmet gawas lang sa usa kinsa maoy nitira sa biktima.

Nasayran nga niadtong Mayo 21, gikan mitambong og hearing si Bontuyan dihang gibanhigan sa duha ka riding in tandem samtang nagsubay sa Pope John Paul Ave. sa Brgy. Mabolo, pipila ka metros lang ang gilay-on gikan sa police station. Dead on the spot ang polis samtang misutoy agi sa estasyonan ang mga wala pa mailhing mamumuno.

Hangtud karon, wala gihapoy giumol nga Special Investigation Task Group ang kapolisan alang niini bisan pa man og napamatud-ang aktibong polis pa ang namatay didto sa Sulu. Karong Huwebes plano sa pamilya nga ilubong na si Bontuyan. (/DILT)(BANATNEWS)