Tulo ka bag-ong tunghaan sa high school

CEBU, Philippines — Hapit na usab nga magbukas ang laing tuig sa pagtungha ug espesyal ang gibating kaikag karon sa mga nagdumala, magtutudlo ug sa mga tinun-an sa tulo ka  bag-ong high school sa Dakbayan sa Lapu-Lapu kay gihimuan sila og bag-ong school building.

Si outgoing mayor ug incoming Congresswoman Paz Radaza sa nag-inusarang distrito sa Lapu-Lapu City, maoy nangulo sa inagurasyon sa mga tunghaan.

Naglakip sa mga bag-ong tunghaan sa high school nahimutang sa  Sitio  Buyong sa Brgy. Maribago nga giinagurahan  niadtong miaging semana.

Magsugod na sa pagbukas ang bag-ong tunghaan sa high school nga nahimutang sa  Brgy. Tungasan sa Isla sa Olango.

Gipahibawo  sa mayor nga gibuksan usab ang night high school sa Brgy. Babag sa paghatag usab og kahigayonan sa ubang mga kabataan nga nagtinguha sa pagtungha sa panahon sa gabii.

Kauban ni  Radaza sa pag-inagurar sa maong mga eskwelahan ang kadagkuan sa Department of Education – Lapu-Lapu City Division nga gipangulohan ni Schools  Division Superintendent Marilyn Andales uban ang mga magtutudlo nga madestino sa maong tunghaan.

Matud ni Radaza nga ang katukoran sa mga bag-ong tulunghaan sa high school usa ka paagi nga maluagan ang ubang mga tunghaan gikan sa gidaghanon sa mga tinun-an ug dili na mahuot ang mga estudyante sa mga lawak saringan. (/DILT)(BANATNEWS)