Police medical mission sa Negros Oriental
CEBU, Philippines — Pwersa sa gobyerno nagpahigayon og medical-dental mission sa tulo ka mga lungsod sa Negros Oriental diin nakalas ang pipila ka mga gikatahong miyembro sa New People’s Army atol sa pagsilbi og warrant of arrest niadtong Marso 2019 ug niadtong Disyembre 2018.
Ang maong misyon gilangkuban sa Police Regional Office- 7, Armed Forces of the Philippines, Philippine Coast Guard, mga departamento sa gobyerno, lokal nga kagamhanan, ug mga pribadong sektor.
Sigun sa direktor sa PRO-7 nga si Police Brigadier General Debold Sinas nga tulo ka hugna ang ilang medical mission diin gisugdan nila kini niadtong Biyernes sa Brgy. Talalak, Lungsod sa Sta.Catalina diin 863 ka pasyente ang naalagaran.
Sunod semana mangadto ang tropa sa Guihulngan City ug sunod ang Lungsod sa Manjuyod.
Gawas sa medical-dental mission, buot sa mga pwersa sa gobyerno nga mahinabi ang mga residente sa maong mga lugar nga giilang ‘CPP-NPA infested areas’.
“… among i-explain nga nag-implement lang mi og batas, walay intentions ang mga polis and army mangharass,” si Sinas nagkanayon.
Dugang pa niini nga kinahanglang maabot sa maong mga lugar ang serbisyo sa gobyerno sanglit tungod sa kakabus ug layo sa sentro sa pangagamhanan, dali ra silang mahaylo sa mga NPA.
Nasayran nga adunay libreng tupi, manicure ug mga dental hygiene kits alang sa mga bata ug mga hamtong, tsinelas, habol, duwaan, ug mga flyers sa kampanya kontra drugas. Pagkagabii niana, gilingaw sa kapolisan ang mga residente pinaagi sa pagsundayag sa kombo. (/DILT)(BANATNEWS)
- Latest
