Pagduso sa SOCE hangtud Hunyo 12
CEBU, Philippines — Gipahinumduman sa buhatan sa Commission on Elections (Comelec) ang nidaug ug napilde nga mga kandidato sa Mayo 13, 2019 nga eleksiyon sa pagduso sa ilang Statement of Contribution and Expenditure (SOCE) diin hangtud sa Hunyo 12 ang tagal niini. Ang matag kandidato nga naglakip sa mga senador hangtud na sa pagka-konsehal sa kalungsuran ug siyudad lukop nasud ang gihatagan og higayon sa pagduso sa ilang SOCE hangtud Hunyo 12.
Ibutyag sa SOCE ang kinatibuk-an nga nagasto sa ilang kandidatura sukad sa pagsugod sa adlaw sa ilang pagpangampanya. Kadtong mapakyas sa pagduso sa ilang SOCE, pilde man o daug, adunay tulubagon ilabi na ang mga nidaug sanglit dili pa sila makalingkod sa ilang katungdanan hangtud nga dili nila matuman ang mao nilang kaakuhan sa pagduso sa ilang SOCE.
Si Mandaue City Assistant Election Officer Joquelyn Reuyan dihang nahinabi sa Banat News niingon nga sa Dakbayan sa Mandaue adunay 22 ka kandidato sa pagka-konsehal, upat sa pagka-mayor ug duha sa pagka-bise mayor nga ilang gipaabot nga makaduso sa ilang SOCE. Sa pagka-konsehal maoy nidaug ang napulo ka kandidato samtang 12 usab kanila ang napilde apan silang tanan kinahanglan gyud nga moduso sa ilang SOCE.
Sa ilang iduso nga SOCE maoy matala ang kwentada sa tanan nga nagasto sa ilang kandidatura nga naglakip sa donasyon o ilang kaugalingong kuwarta nga gigasto sa tibuok panahon sa kampanya. (/GMR)(BANATNEWS)
- Latest
