Mga sakyanan sa siyudad idonar

CEBU, Philippines – Tinguha ni Konsehal Dave Tumulak nga idonar ang mga sakyanan sa Siyudad sa Sugbo ngadto sa Bureau of Jail Management and Penology, Bureau of Fire Protection ug Cebu City Police Office nga maoy kasamtangang naggamit niini. Kini pinaagi sa resolusyon nga iyang iduso sa konseho atol sa ilang sesyon karong Martes sunod semana.

Ang mga sakyanan naglangkub sa Suzuki/APV Ambulance van nga gigamit sa BJMP-7 ug tulo ka ambulance van ug usa ka pick-up nga gigamit sa BFP-7. Ang CCPO dunay 42 ka sakyanan nga nakarehistro sa siyudad nga gigamit isip patrol cars.

Tabang kini sa Cebu City Government nila alang sa ilang inadlaw adlaw nga operasyon. Gihulagway ni Tumulak nga maoy chairman sa Committee on Public Order and Safety nga makaayo kini sa siyudad sanglit ang oil, lubricants, fuel ug ubang maintenance sa sakyanan, ang maong mga buhatan naman ang moabaga ug makadaginot ang dakbayan ilabi na ang sunod administrasyon.

Nahinabi ni Tumulak ang maong mga buhatan ug matud pa nga bisan kaniadto mao na kini ang ilang gipangayo nga maadto na nila ang mga sakyanan.

Gipasabot ni Tumulak nga usa kini ka pamaagi sa konseho nga makatabang sa sunod administrasyon nga makaminus sa gasto ug magamit ang pundo sa uban pang serbisyo nga makahatag og kaayuhan sa katawhan sa siyudad. (/GMR)(BANAT NEWS)