Gipatay nga polis dunay mga kaso sa Ombudsman

CEBU, Philippines – Gipatay nga si Police Captain Delfin Bontuyan giingong nag-atubang og six counts sa kasong dishonesty didto sa Ombudsman ug giimbestigahan pud nunot sa unexplained wealth sumala pa ni Police Regional Office-7 nga si Police Brigadier General Debold Sinas.

”Naa siya’y case for dishonesty, he was also a subject for ill-gotten wealth, unexplained wealth, pero kadtong dishonesty definite na, kadtong investigation we are not so sure kinsay nag-handle sa investigation,” nagkanayon si Sinas.

Ang hepe sa Intelligence and Investigation Division as Regional Internal Affairs Service sa PRO-7 nga si Prince Robles mibutyag nga gipasakaan sa ilang opisina og kaso si Bontuyan niadto pang nadestino kini sa Criminal Investigation and Detection Group (CIDG-7) niadtong tuig 2016.

Tug-an ni Robles nga niadtong buwan sa Enero karong tuiga, adunay gipasa nga dokumento ang kampo Crame kabahin kang Bontuyan aron maoy basehan sa ilang imbestigasyon.

Apan wala motug-an si Robles sa media kun unsa kini nga mga dokumento ug kun may kalabotan ba kini sa ill-gotten wealth sa maong polis.

 Sa pagkakaron, ang mga imbestigador sa Mabolo Police Station pa ang naggunit sa maong kaso.

Hangtud karon wala gihapon silay matumbok nga mamumuno. Padayon gihapon ang ilang pagtuong drug personality ang mibuhat niini sa biktima.

Ang teyoriya sa kapolisan nga posibleng adunay gisaaran si Bontuyan nga ma-dismiss ang kaso aning tawhana diha sa korte apan napakyas kini.

Gikan nitambong sa hearing sa kaso si Bontuyan ug pauli na unta kini dihang gibanhigan sa duha ka paresang riding-in- tandem samtang nagsubay sa Pope John Paul Avenue, Barangay Mabolo, pipila ka metros gikan sa Mabolo Police Station.

Panalipod pa ni Sinas nga maong na nataud-tauran ang mga polis sa Mabolo pagresponde tungod kay walay naka-report dayon sa maong hitabo bisan og duol ra kaayo kini sa ilang police station. (/IBM)(BANAT NEWS)