Bantayan labing apektado sa El Niño

CEBU, Philippines – Moabot na ngadto sa kapin P122 milyones ang danyos tungod sa El Niño phenomenon sa 35 ka lungsod ug dakbayan sa tibuok Lalawigan sa Sugbo.

Basi sa datus sa Provincial Disaster Risk Reduction and Management Office (PDRRMO) nga moabot sa 13,128 ka pamilya o 67,057 ka indibidwal ang apektado sa huwaw.

Sa maong datus, 962 ka mananagat ug 7,622 ka mag-uuma ang apektado.

Sa mga local government units (LGUs), ang Lungsod sa Bantayan, mitala og dakung danyos, tungod sa ice-ice disease nga miigo sa mga guso diin miabot og P24 milyones ang gibana-banang danyos.

Ang ika-duha sa daku og danyos nga naangkon mao ang Lungsod sa Tuburan nga adunay P19.9 milyones, diin apektado kaayo ang ilang kahayupan ug agrikultura ilabi na ang coffee farming.

Ang sunod mao ang Lungsod sa Compostela nga mitala og P14.3 milyones nga danyos sa high valued crops.

Matud ni Rhee Telen Jr., disaster officer sa PDRRMO ngadto sa mga LGUs, 16 na ang mideklarar og state of calamity. Apil na niini ang Madridejos, Samboan, Talisay, Asturias, Compostela, Carmen, Tudela, Ginatilan, Carcar, Sogod, Alcoy, Minglanilla, Dumanjug, Santander, Danao, Toledo.

Sumala ni Telen nga moabot na usab sa P32 milyones gikan sa P59 milyones nga quick response fund alang sa purchase request sa pagpalit og bugas, food packs, water tanks/containers ug uban pa nga ayuda ngadto sa mga apektadong residente.

Dugang ni Telen nga wala ra hinoun maapektuhi ang pagpagawas og pundo sa transition period karon sa administrasyon sa Kapitolyo sanglit ang mga purchase request naandam na daan sa wala pa ang election period human nga mideklarar og state of calamity ang lalawigan tungod sa huwaw. Hagit karon sa Kapitolyo mao ang pagpangita og supplier nga maka-deliver sa mga suplay ilabi na sa water tank sanglit mao kini ang kinahanglan paghakot og rasyon sa tubig ngadto sa mga dapit nga nagnihit na ang suplay. Hinuon matud ni Telen nga nakapangita na sila og supplier sa tanker nga rentahan nga maoy gipadala sa amihanan, habagatan ug mga isla sa probinsiya pagrasyon sa tubig. (/DILT)(BANAT NEWS)