16 ka diocese nagtagbo sa Dakbayan sa Sugbo

CEBU, Philippines – Nagtagbo sa Dakbayan sa Sugbo sugod kagahapon hangtud karong adlawa ang 16 ka diocese lukop nasud aron ambitan ang mga lakang nga gihimo sa simbahan sa pagtabang sa programa sa gobiyerno sa war on drugs.

Ang Nassa Caritas Philippines ug Ideals ang nangulo sa maong programa nga gitawag ug Dignitas Conference on Human Dignity ubos sa tema nga “We have so much to do, and we must do it together”.

Ang maong kalihukan nga gipahigayon sa Dakbayan sa Sugbo mao ang unang higayon.

Usa ka Santos nga Misa ang gipahigayon una gibuksan ang maong kalihukan nga gisundan sa pagpaambit sa usa ka pamilyahan nga kanhi naulipon sa ilegal nga drugas apan tungod sa abag sa Surrender to God Program sa Archdiocese of Cebu kapin na sa duha ka tuig silang wala nay bisyo ug malipayon na ang tibuok nilang banay.

Samtang si Archbishop Jose Palma sa Archdiocese of Cebu maoy ni welcome sa mga delegado ug nipaambit  usab sa iyang mensahe.

Matud ni Palma nga tungod sa panagtapok sa maong 16 ka diocese makita nga adunay panaghiusa alang sa pagtabang sa kagamhanan. Si Palma nagkanayon nga sayod siya nga adunay dako nga mahimo ang mga delegado alang sa ilang kaugalingon ug sa diocesan level tungod kay nagatuo siya nga usa ka gasa ang pagtinabangay.

Si Palma naglaom nga pinaagi sa gasa sa pag-ambitay sa matag diocese matuman ang pangandoy sa tanan nga bisan sa mga pagsuway ug kadangog sa kalibutan tungod sa mga tentasiyon aduna gihapoy paglaum. (/BDB)(BANAT NEWS)