Duha ka esnatser gipamusil patay

CEBU, Philippines – Duha ka mga grupo sa mga snatchers diha sa downtown area sa Dakbayan sa Sugbo gikatahong nagpinatyanay niadtong Lunes sa gabii tungod sa ilang hurisdiksiyon.

Unang nahagba patay atubangan sa usa ka fast food chain diha sa dalan Colon, barangay Kalubihan, ang biktima nga giila nga si Gerald Maramara Villamor alyas Dodoy, 20, residente sa Barangay Bulacao-Pardo, Cebu City.

Sa inisyal nga imbestigasyon, alas 10:30 sa gabii nagbarog ra ang biktima atubangan sa usa ka tindahan dihang giduol kini og duha ka mga wa mailhing mga lalaki ug gipusil kini.

Nakadagan pa ang biktima apan nahagba kini atubangan sa usa ka sikat nga fast food chain sa maong dapit.

Sigun sa kapolisan, girespondehan kini sa Cebu City Risk Reduction Management Office Paramedics apan giingong wala nay pulso ug nabugtoan na sa iyang kinabuhi si Villamor. Paglabay og dul-an 20 minutos, gipusil patay sab atubangan sa usa ka pension house diha sa eskina sa Manalili ug Legaspi Streets, Barangay Santo Niño, si Jay Bulaong Caruana alyas Jay-R, 28.

Wala sab mailhi ang duha ka mga lalaking mipusil kaniya.

Ang hepe sa Waterfront Police Station nga si Police Major Joemar Pomarejos miingon nga tambayanan gyud sa mga snatchers sa Manalili ang atubangan sa maong pension house.

“Anha gyud na sila magtambay, mangita og mga targets,” sigun sa maong hepe.

Dako ilang pagduda nga nagbawsanay ang duha ka mga grupo.

Samtang gipasabot sa hepe sa Carbon Police Station nga si Major Randy Caballes nga sa ilang nahibaw-an, adunay duha ka grupo sa mga snatchers sa Colon: Ang usa diha sa Manalili samtang ang ikaduha anaa sa Borromeo.

Matud niya, si Villamor naa sa grupo sa Borromeo samtang si Caruana sa Manalili.

Ang teyoriya ni Caballes, nag-away ang grupo tungod sa hurisdiksyon ug posibleng si Villamor nakalapas niini ug siya gipatay, apan dali nga mibawos ang pikas grupo ug gipatay sab si Caruana.

Matud ni Pomarejos nga dako sab ang posibilidad nga si Caruana  maoy mipusil kang Villamor.

Sigun pa ni Caballes nga nalambigit na sa pipila ka mga kaso sa snatching si Villamor apan wala kini mapasakai og kaso kay di man mopadayon og kiha ang mga biktima kay di gustong mahasol. Apan napriso na kini niadtong 2017 tungod sa illegal nga drugas.

Samtang si Caruana nadakpan na niadtong 2016 sa kasong pagpanulis ug pagkalambigit sa illegal nga drugas. (Rowena Capistrano/IBM)(BANAT NEWS)