Opisyal gi-ambush

CEBU, Philippines – Polis nga gikan nitambong og hearing gipusil patay kagahapon samtang nagsubay sa Pope John Paul Avenue, Barangay Mabolo kagahapon sa hapon duol sa usa ka dakong mall ug dili layo gikan sa Mabolo Police Station ning Dakbayan sa Sugbo. Giila sa kapolisan ang nakalas nga si Police Captain Delfin Bontuyan,55, residente sa Talamban nga nadestino sa Jolo, Sulu.

Sigun pa sa deputy chief sa Mabolo Police Station nga si Police Captain Miles Damoslog, gikan nitambong sa hearing si Bontuyan didto sa Regional Trial Court Branch 13, Cebu City sa Qimonda. Hearing kadto sa kasong iyang gikuptan niadtong nadestino pa siya sa operations sa Criminal Investigation and Detection Group-7 (CIDG-7).

Paingon na unta mouli ang biktima sakay sa iyang Yamaha NMax nga may plakang 0701-650 145 dihang gitirahan siya sa duha ka mga riding-in-tandem nga nagsunod niya.

Nalamba sa tapad nga taxi ang biktima. Si Michael Añora, 47,  taxi drayber sa Niñal Taxi nga diin nalamba ang biktima, nagkanayon nga nagpaabot sila nga mo go signal dihang nakadungog na lang siya og buto-buto.

Giingong ang usa ka motor mitupad sa biktima samtang ang usa mibabag ni Bontuyan.

“Murag gi-timing gyud nga orange pa ang signal kay pag green na nisutoy na man sila, nihupo na lang gyud ko pagbuto-buto, naa pa gyud koy pasahero duha ka tiguwang, human sa boto-boto dali-dali mi ninaog,” sigun ni Añora.

Sa inisyal nga pagsusi sa mga imbestigador wala nakabawos si Bontuyan bisan pa man og nagdala kini og armas. Gisusi pa karon ang palibot kun dunay CCTV camera sa lugar ingon man kun nakuha ba kini sa dashcam sa taksi ni Añora.

Ang anak sa biktima nga si Christine Claire Bontuyan, SK chairman sa Talamban dali sab nga miadto sa nahitaboan.  Ang direktor sa Cebu City Police Office nga si Police Colonel Royina Garma kinsa nahimong director sa CIDG-7 una pa kini nabutang sa iyang pwesto karon, wala kaayo masuhito kang Bontuyan. Matud niya ang iyang nahibaw-an gibalhin si Bontuyan sa Cordillera ug nahimong hepe sa usa ka police station didto sa Jolo, Sulu. Dugang pa ni Garma nga base sa impormasyon, gibalhin gawas sa rehiyon si Delfin tungod kay ang mga kasong gihuptan niini may labot sa illegal nga drugas nanga-dismiss.

Gimando ni Garma nga subayon ang mga kasong gihuptan ni Bontuyan kaniadto aron masuta kun aduna ba kini koneksyon sa pag-ambush kay nagtuo siyang planado kini kay nasayod gyud ang mga mamumuno kun kanus-a siya mouli sa Sugbo aron motambong og hearing. (/IBM)(BANAT NEWS)