Sakop sa bombero sikop sa buy-bust
CEBU, Philippines — Giingong sakop sa bombero ug laing usa pa, nasikop sa managlahing buy-bust operation sa kapolisan.
Unang nasikop mao ang 34-anyos nga taga Sitio Langub, Brgy. Poblacion sa Lungsod sa Cordova.
Gibutyag ni Police Captain Efren Diaz Jr., hepe sa Cordova Police Station nga ang ilang nadakpan alas siete pasado ang takna sa miaging gabii mao si Jade Tecson Dumosmog kinsa giingong sakop sa bombero.
Nasikop kini sa may Purok Dagat, Brgy. Buagsong sa Lungsod sa Cordova diin nakuhaan kini og kapin sa P13 mil nga kantidad sa gidudahang shabu basi sa Dangerous Drug Board value ingon man ang P500 nga buy-bust money ug disposable lighter.
Laing gituohang pusher og shabu nga nadakpan mao ang 55-anyos nga si Enrique Tayag nga taga Purok Tambis, Sitio San Antonio, Brgy. Jubay sa Lungsod sa Liloan.
Nasakmitan kini og walo ka gagmay nga pakete sa gituohang shabu, cellphone ug P500 nga buy bust money.
Ang mga dinakpan, kasamtangan karong gitanggong sa sulod sa detention cell ug gikatakdang pasakaan og kaso nga kalapasan sa Republic Act 9165 o Comprehensive Dangerous Drug Act of 2002. (/DILT)(BANATNEWS)
- Latest