Kapolisan nipahimangno batok gang

CEBU, Philippines — Giawahag sa kapolisana ang mga ginikanan nga hingusgan ang pagpalayo sa ilang mga anak sa mga “gang” nga motumaw sa pagsugod sa klase.

Si Police Captain Arieza Otida, ang information officer sa Cebu City Police Office, niingon nga labing tutukan sa mga polis nga dili masaag sa sayop nga dalan ang mga bata.

Iyang gihulagway nga dali kaayong malingla ang mga bata sa nagkalainlain nga dautang elemento maong angayan hatagan sa saktong paggiya.

“Ang mga ginikanan atong awhagon na dili lang kapolisan ang mangusog, apil na ang parents, dapat focus sila sa ilang ginikanan, magtinabangay dapat ang ginikanan ug ang kapolisan,” si Otida niingon.

Nidugang pud siya nga 24-oras nga magbantay ang kapolisan nga ipakatap alang sa Brigada Eskwela hangtud sunod semana.

Si Otida nipasalig nga apil sa direktiba ni CCPO Director Royina Garma nga kinahanglang makita gyud ang mga polis nga nadestino aron masegurado ang ilang seguridad.

“As per directive ni CD, kinahanglan visible at all times, labi na ang kabatan-onan prone sa badlungon sa katilingban, magmatngon sa crimes, and petty crimes na vulnerable ang mga bata,” si Otida niingon.

Samtang malinawon ang unang adlaw sa Brigada Eskwela nga gisugdan kagahapon ubos sa tema nga “Matatag na Bayan Para sa Maunlad na Paraan.”

Bitbit sa mga ginikanan ang pipila ka kagamitan sa pagpanglimpyo sama sa silhig, daspan, sako ug uban pa kuyog ang mga magtutudlo sa Mambaling Elementary School nihimo sila og pagpanglimpyo sa unang adlaw kagahapon.

Matud ni Marie Balansag, usa sa mga magtutudlo sa MES, nga nagsugod na sila sa Brigada Eskwela ug padayon sila nga nanginahanglan og mga stakeholders nga mahimo nilang ka tambayayong sa ilang mga kalihukan sa brigada.

Sumala pa ni Balansag nga nanginahanglan sila og mga sponsors apan dili sila mamili kung unsay ihatag niini kay bukas ra sila modawat nga nagdepende sa “willingness” sa adunay malumo nga kasingkasing.

Nag-unang panginahanglanon sa Brigada Eskwela ang mga kagamitan sama sa pagpanindot sa mga classrooms hinungdan nga bukas ang mga tunghaan nga modawat niini.

Gitug-an ni Balansag nga sa gusto motabang mahimo ra sila makig-alayon sa principal sa Mambaling alang sa ilang buot ipaambit para sa nagpadayon nga Brigada Eskwela.

Sa laing bahin ang direktor sa Cebu Provincial Police Office nga si Police Colonel Manuel Abrugena niingon nga andam na sab sila ug kung aduna’y kinahanglan usbon ila pud agdon ang tagsa-tagsa ka eskwelahan ilabi na ang DepEd.

“Hinggil sa preparations on Balik Eskwela, meron na tayong security plan nyan, tapos na ang election, so aming balikan ang aming mga security plans at i-update kung sakaling may mga babaguhin,” sigun pa ni Abrugena sa Banat News. (BANAT NEWS)