Waste-to-energy tun-an sa sunod administrasyon

CEBU, Philippines — Nangandam na karon ang outing transition team sa kasamtangang administrasyon sa kagamhanan sa Siyudad sa Sugbo, usa sa mga proyekto nga ilang i-turnover sa umaabot nga bag-ong administrasyon mao ang implementasyon sa waste-to-energy facility.

Ang pangulo sa Cebu City Environment and Natural Resources Office nga si Nida Cabrera miingon nga nanghinaot siya nga si Mayor-elect Edgardo Labella mokonsiderar sa pag-establisar og WTE aron masiguro ang saktong disposal sa basura.

“Sa present needs sa Cebu City sa solid waste management, it’s high time na nga mo-decide ang siyudad to come up with new technology, alternative technology in the sense nga wala nay landfill atong siyudad kay ang all open dumping gipa-close naman gyud siya base sa national order”, matud ni Cabrera.

Dihang gipangayuan og komento si Labella, kini miingon nga ang WTE facility adunay maayong konsepto apan iya una kining i-review inig lingkod niya sa katungdanan karong Hunyo 30 sa udto.

Ang WTE usa ka pasilidad diin ang mga basura himuong resources nga magamit sa kagamhanan.

Sa pagkakaron ang Asian Development Bank nag-review na sa duha ka firms nga nagtanyag og managlahing teknolohiya alang sa landfill.

Sigon ni Cabrera anugon ang resources kon ang incoming administration mobasura sa WTE project ilabi na nga ang city government gitanyagan og P40 million sa ADB alang sa pagtuon niini.

Kini miingon nga ang ADB mihatag og pagtugot sa siyudad sa pagsusi sa mga proposals ug pagrekomendar sa kompaniya nga nakatuman sa tanang rekisitos labot na ang environmental laws.

Kon mahimong operational ang WTE facility, si Cabrera miasoy nga ang siyudad aduna na unyay modernized collection ug final disposal sa basura sanglit ang proponent sa WTE facility mao nay mokolekta ug mo-dispose sa basura.

Nagkanayon sab kini nga ang ADB nakahatag na og dokumento sa buhatan sa mayor labot sa ilang initial recommendations sa duha ka firms nga nagtanyag og managlahi nga teknolohiya.

Apan matud ni Cabrera nga wala siyay ideya kon si outgoing Mayor Tomas Osmeña mohimo og aksyon sa rekomendasyon ilabi na nga magpabilin kini sa buhatan hangtod Hunyo 30. (BANAT NEWS)