Trapik patutukan ni samsam

CEBU, Philippines — Ang nagkagrabe nga trapiko sa Siyudad sa Talisay maoy usa sa itugyan ni Congressman-elect Eduardo “Eddiegul” Gullas sa iyang apo nga si Mayor-elect Gerald Anthony “Samsam” Gullas.

Buot kasamtangang mayor nga si Eddiegul nga mahatagan kini og kasulbaran o bisan man lang maiban-ibanan.

Matud pa sa beteranong Gullas nga sa iyang usa ka termino isip mayor sa Dakbayan sa Talisay iyang gibuhat ang unsa man nga maayo alang sa trapiko apan kuwang ra gyud kini aron mahatagan og kasulbaran.

Hinoon bisan pa man dili na siya mayor kaabag gihapon niya si Samsam kun unsa man ang mga huna-huna niini nga makaayo sa siyudad.

“We cannot deny nga traffic gyud kay duol ra man ta sa Cebu City,” asoy pa ni Eddiegul.

Siya nagkanayon nga nagkadaghan gyud ang mga sakyanan apan ang mga karsada mao ra gihapon ang gilapdon.

Sa iyang tan-aw mas maayo gyud nga mokuha o mutudlo si Samsam og traffic czar nga maoy motutok sa maong suliran.

Apan wa sab niya gi-pressure ang bag-ong mayor kay nagtuo siya nga anaa pud kini mga prayoridad nga proyekto ug kini naglakip na sa trapiko nga iyang gihisgutan. (/GMR)(BANATNEWS)