Eddiegul niawhag ipa-recycle ang campaign posters
CEBU, Philippines — Giawhag ni mayor ug congressman-elect Eduardo Gullas ang mga miyembro sa Alayon ingon man ang kabarangayan nga i-recycle ang nahipos nga mga campaign poster. Kini aron kapahimuslan pa ang mga tarpaulin o plastik nga campaign posters nga ilang gipapilit ug gipangbitay sa ilang pagpangampaniya sa nilabay’ng eleksiyon.
Matud ni Gullas nga kong pasagdan lang ang mga tarpaulin posibleng ilabay kini diha sa mga kanal nga mao na unya’y hinungdan sa pagkabarado ug hinungdan usab sa baha panahon sa uwan.
Samtang si kongresista ug mayor-elect Gerald Anthony “Samsam” Gullas, Jr. nagkanayon nga wala na nila gipaabot nga ang Comelec pa ang motawag sa ilang atensiyon aron sila manglimpiyo.
"You know ang Comelec daghan na kaayo sila og gilihok, karong panahona busy kaayo and gawas ana obligasyon man gyud na namong mga nagpapili sa nilabay’ng election nga tangtangon ang among mga poster human sa piniliay”, matud ni Samsam.
Matud ni Samsam nga mahimo gyud kaayo nga i-recycle ang mga tarpaulin ug magdepende kini sa tawo nga adunay kaalam sa paggama og bisan unsa gikan sa recycle material aron kini mapahimuslan.
Si Konsehal Gail Restauro kinsa nahatagan og laing mandato sa katawhan sa iyang ikaduhang termino nagkanayon nga ang iyang tarpaulin gigamit na sa mga Talisaynon aron ibutang sa ilang traysikad isip tabon o pandong lakip usab sa mga tangkal sa manok.
Una niini, si Atty. Charise Faith Sojor, Comelec officer sa siyudad nipadala na og suwat ngadto sa mga kandidato nga tangtangon na ang ilang mga campaign poster. (/BDB)(BANATNEWS)
- Latest
