Villarojo gitudlo ni Pope Francis nga bishop-elect sa Malolos
CEBU, Philippines – Hingpit na nga mobiya si Cebu Auxiliary Bishop Dennis Villarojo sa Archdiocese of Cebu human kini gitudlo ni Pope Francis isip bishop-elect sa Diocese of Malolos niadtong Martes sa alas 6:00 sa gabii sa Pilipinas ug alas 12:00 sa udto ngadto sa Roma.
Si Villarojo maoy kasamtangang team moderator sa Sacred Heart Parish Capitol.
Si Archbishop Jose Palma nipahibalo sa maong balita atubangan sa mga board of consultors, seminary formators, administrative board, invited lay guest, media ug atol usab sa adlaw ni Monsignor Achilles Dakay.
Gibutyag ni Palma nga ang Diocese of Malolos dugay ra nga nangindahay nga makabaton og Obispo human nipanaw na ngadto sa laing kalibutan si Bishop Jose Francisco Oliverso.
Matud ni Palma nga sayon ra kaayo ang pagkuha sa mga Obispo apan lisod ang paghatag og hulip niini. Hangtud karon giingong wala pa mahuman ang gihimo si Auxiliary Bishop Oscar Florencio isip Obispo sa Military Ordinariate of the Philippines.
Si Palma nagkanayon nga dako usab ang bag-ong tahas ni Villarojo tungod kay dako man usab nga diocese ang Malolos ug malaumon usab siya nga mahulipan usab ang Diocese sa Sugbo ug mga bag-o human gikuha ang duha ka auxiliary bishops.
Si Villarojo sa iyang bahin, nitug-an nga niadtong Mayo 5 nakadawat siya og impormasyon gikan sa iyang classmate hinungdan nga mapasalamaton siya sa oportunidad ug sa komunidad ilabi na sa mga layko nga hugot ang suporta nga gihatag.
Wala pay tukma nga petsa ang hingpit nga paglingkod ni Villarojo ngadto sa Malolos tungod kay makig-alayon pa siya sa Diocese of Malolos. (/BDB)(BANAT NEWS)
- Latest
