17-anyos patay sa rambol
CEBU, Philippines – Patay ang 17-anyos nga lalaki human nadunggaban sa gikaengkwentro nga grupo sab sa mga menor de edad sa eskina sa dalan sa Barangay Pagsabungan ug Basak, Dakbayan sa Mandaue diin may 20-metros lang ang gilay-on sa Police Station 3.
Si Police Staff Sergeant Lemer Pontillas sa Presinto 3 sa Mandaue City Police Office (MCPO) niila sa biktima nga si Jovel Casas nga taga Barangay Paknaan sa maong dakbayan.
Matud ni Pontillas nga alas 2 pasado niaging kaadlawon nga nagkaabot ang duha ka grupo sa mga menor de edad nga mga lalaki nga nagrambol pinaagi sa pagbinunalay og paglabayay og mga bato.
Sa maong panagrambol ang biktima kalit lang nahagba sa karsada nga nagkadugo na ang kalawasan tungod sa naangkon niining samad dinunggaban nga nakaingon sa hinanali niyang kamatayon.
Si Pontillas niingon nga dihang ilang gitubag ang alarma dali sab nakapanagan pahilayo ang matag grupo.
Dugang ni Pontillas nga namatikdan nila karong panahona ang pagsiaw sa nagkadaiyang grupo sa mga batan-on nga maglaroy-laroy sa maong dapit bisan lawom na ang kagabhion nga mosangko sa pagsuyaay ug panagrambol.
Nakamatikod sab sila nga kung ang mga polis magpatrolya mag-iyahay usab kini sa pagpanagan ug motago sa kabalayan. (/GMR)(BANAT NEWS)
- Latest