Barangay hall giransak

CEBU, Philippines – Gisulod ug giukay sa mga armadong mga lalaki ang Barangay Hall sa  Barangay Apas sa Dakbayan sa Sugbo, ang mga lalaki giingong nangita sa mga matud pa salapi nga gamiton pagpalit og boto.

Ang pangulo sa Barangay Risk Reduction Management Office nga si Freddie Velasco miingon nga alas-3 sa hapon kalit nga misulod sa ilang buhatan ang mga lalaki nga nagsibilyan, nagtaptap sa ilang mga nawong ug armado og M16 nga armas.

“Naa mi sa command center nag-meeting nadunggan na lang namo nga adunay komosyon sa gawas pag-abli namo mao na ‘to amo naabtan nga naa ‘tong mga tawong nagtaptap ug nagdala og mga tag-as nga armas,” sigun niini.

Asoy ni Velasco nga nagtagalog ang maong mga suspek apan matud pa nga maklaro nila nga mga bisaya ra kini.

“Ana sila ‘dapa!’ Nagtagalog sila pero maklaro gud nimo nga mga bisaya,” sigun niini.  Matud pa nga nangita ang maong mga lalaki sa ilang kapitan.

Si Apas Barangay Captain Virgilio Cabigon ka-alyado ni Mayor Tomas Osmeña sa Bando Osmeña Pundok Kauswagan (BOPK).

Giingong giukay sa mga armado ang ambulansya nga daw adunay gipangita.  Hinuon walay nangawala sa mga butang sa ambulansya apan gipanguha ang tulo ka mga cellphones sa mga barangay employee diha sa mga lamesa.

Samtang ang barangay secretary nga si Eddie Villa mitug-an nga sakay og puti nga van ang mga armado paingon sa amihanan.

Ang direktor sa Police Regional Office-7 nga si Brigadier General Debold Sinas nagkanayon nga ilahang  imbestigahon ang hitabo apan di pa siya kaingon kun politika ang motibo niini. (/IBM)(BANAT NEWS)