Aplikante sa AFP mireklamong uso gihapon ang “backer-backer”

CEBU, Philippines — Aplikante sa Armed Forces of the Philippines-Central Command mireklamong kusog gihapon ang “backer” aron makasulod sa maong hanay.

Usa sa mga wala madawat pagka-kadete sa 53rd Engineering brigade mireklamo sa Banat News diin giingong gipaasa ra sila sa mga labaw sa AFP sanglit bisan pa man og wala pa nakakuha og usa ka matang sa exam, gitaktak na.

Giingog aduna say uban nga bisag nakapasar na sa tanang physical ug mental examination ug gibutang sa waiting list aron makasulod, gitaktak gihapon.

Reklamo sa maong mga aplikante nga daku na kaayo sila og nagasto sa sige og renew sa ilang mga papeles samtang nagpaabot nga makasulod sa AFP ingon man ilang pamlete.

“Okay lang sa amin kahit ilang beses kaming mag-renew kasi sabi nila priority kaming mga old applicant, kaso noong April 15, 2019 the day of screening, bigla nawala daw ang list sa mag ti-take ng Neuro. Tapos na shock na lang mi after an hour nanga-slashed na mi mga old applicant na walang tamang dahilan. Kaya pala na slashed kami, kasi higpit ang backeray dito. Mga bago ang pinalit nila sa amin,” sigon sa reklamante nga gipugngan sa Banat News ang pangalan niini.

Apan depensa sa tigpamaba sa AFP-CENTCOM nga si Major Abel Potutan nga walay backer-backer sa AFP ug patas ang oportunidad sa tanan.

Usa pa, giingong wala pa mipagawas og pinal nga listahan ang 53rd Engineering brigade.

“Normal actuation sa applicant labi na kung ma-slash ila name na muingon sila pabor-pabor o backer-backer ang pagpanundalo pero sa ako tan-aw patas ang proseso sa tanan applicants,” nagkanayon si Potutan.

Giawhag niini ang mga adunay reklamo nga modangop sa ilang buhatan aron mahatagan og katin-awan. (/DILT)(BANATNEWS)