Wala nangampanya ang polis

CEBU, Philippines — Gihimakak sa Cebu City Police Office ang pasangil nga nitabang sila pagpangampanya pabor sa kaatbang ni Cebu City Mayor Tomas Osmeña didto sa bukirang barangay sa siyudad.

Kini may labot sa post sa facebook sa mayor nga nagpakita sa video nga giingong gipatapok sa kapolisan ang mga drayber sa habal-habal ug gipugos sila sa pagpapaminaw kanila ni Vice Mayor Edgardo Labella ug kanhi mayor Michael Rama nga midiskurso.

Diha sa video nakita si CCPO Director Royina Garma nga nag-speech atubangan sa mga drayber ug pagkahuman misulod si Police Major Chuck Barandog nga mipaila sa mosunod nga speakers.

Didto na nisulod si Labella nga kaatbang ni Osmeña sa pagkamayor ug nag-speech. Nadunggan sab ang tingog ni Rama nga kandidato sa pagka-bise mayor apan walay video niini kun anaa ba sab siya sa stage. Misunod nga gipaila si Erik Espina nga magpapili sab pagka konsehal sa dakbayan.

Apan sa phone interview sa Banat News giklaro ni Garma nga ang maong video niadto pang Agosto 1, 2018 nahitabo ug kadto kabahin sa nationwide launching sa programa sa PNP ‘Clean Rider’ ug dili tungod sa eleksyon kay dili pa campaign period niadtong tungura.

“Siya (Labella) kinuha naming guest speaker masama ba yun?,” si Garma nagkanayon kinsa mihulagway sa video nga gisumpay-sumpay ra. (/IBM)(BANATNEWS)