Liquor ban nagsugod na

CEBU, Philippines — Liquor ban sugdan na sa pagpatuman karong adlawa, apan giingong adunay pipila ka mga establisamento exempted niini, samtang gipaningkamotan sa kapolisan nga ma-zero election related incident ang piniliay ugmang adlawa.

Ang direktor sa Mandaue City Police Office nga si Police Colonel Julian Entoma nagtuo nga ang vote buying maoy usa sa mga hinungdan sa kagubot sa eleksyon.  Hinungdan nga molusad sila og ‘vote buy bust’ operation sa ilang dakbayan.

Samtang sa Dakbayan sa Sugbo, nagsugod na og roving sa mga polling centers si Cebu City Police Office Director Colonel Royina Garma kini matud pa aron sa pagsiguro nga kompleto ang mga polis nga gipangdeploy.

Kaganinang alas 12 sa tungang gabii gisugdan ang implimentasyon sa liquor ban sa tibuok nasud.

Sa Dakbayan sa Lapu-Lapu diin daghang mga resorts ug bars nga dugokon sa mga turistang langyaw, giingong pipila nila exempted sa maong ban.

Gipasabot sa direktor sa Lapu-Lapu City Police Office nga si Police Colonel Limuel Obon nga dakpon nila kadtong walay exemption sa liquor ban ug walay permit gikan sa Department of Tourism.

Samtang sa Cebu City,  si Garma miingon nga apilon nila pagdakop ang nagbaligya sa ilimnong makahubog kun duna silay masakpan. (Romeo Limpangog/IBM)(BANATNEWS)