Radaza: Wala sa among kinaiya ang mopatay og tawo
CEBU, Philippines — Si Lapu-Lapu City mayoralty candidate Arturo "Boy" Radaza nagkanayon nga wala sa ilang pagkatawo nga mopatay og tawo.
Kahinumduman nga namasangil si mayoralty candidate Ahong Chan ngadto sa mga Radaza nga mo-ambush kaniya, kay mga desperado na kini ug hayag na ang iyang kadaugan.
Matud ni incumbent Lapu-Lapu Mayor Paz Radaza atol sa press conference sa grupong Deretso nga wa gyud na sa kinaiya sa mga Radaza ang mangambush labaw na nang mopatay.
Sigon sa magtiayong Radaza nga nag-drama si Chan nga maghimo og scenario nga kagubot aron mabutang ang siyudad ubos sa Comelec control.
Matud sa magtiayon, wala silay problema kon ipa-ubos sa Comelec control ang siyudad apan matud pa nila makadaut kini sa turismo sa ilang lugar nga maoy gisaligan nga panginabuhian sa mga residente.
Ang magtiayon misuwat usab ngadto kang Lapu-Lapu City Police Office director PSSupt. Lemuel Obon diin mihangyo sila sa pagpahigayon og autopsy sa lawas ni Cesar Ybañez Siaton, nga gipusil ug namatay human sa campaign sortie sa Brgy. Babag niadtong April 27, 2019.
Si Siaton giingong supporter ni Chan. Samtang ang tibuok pamilya ni Siaton supporters usab sa mga Radaza.
Buot sa magtiayon nga ma-autopsy si Siaton aron masuta ang tinud-anay nga panghitabo. (/DILT)(BANATNEWS)
- Latest
