Nagdala’g shabu gi-ambush

CEBU, Philippines — Duha ka mga lalaki nga nagdala og binultong drugas gibanhigan diha sa Barangay Lutac, Dakbayan sa Naga niadtong Biyernes sa hapon.

Nangaangol ang mga biktima nga giila nga silang John Rey Briones, residente sa barangay Cadulawan, Minglanilla; ug Roberto Demiao, lumad nga taga Hinunangan, Southern Leyte ug kasamtangang nagpuyo sa Barangay Tunghaan, Minglanilla.

Sigun pa ni Police Master Sergeant Michael Villarmia, nagbiyahe ang duha sakay ang usa ka motorsiklo nga walay plaka gikan sa Dakbayan sa Toledo ug paingon sa Minglanilla.

Pag-abot sa nahitaboan gibanhigan sila og usa ka pares sa riding-in-tandem. Naigo sa dughan ang duha hinungdan sa ilang pagkasaliring sa karsada ug gibiyaan sa mga namusil.

Ang mga mirespondeng polis na ang nakakaplag sa binultong shabu nga dala sa duha.

Aduna kini gibug-atong 105 ka gramo diin kun basehan sa Dangerous Drug Board Value, mikabat na kini ngadto sa P714 mil.

Sigun sa polis nga posibleng may kalabotan kini sa drogas nga ilang dala gikan sa Toledo.  “Believed to be drug related ni,” sigun ni Villarmia.

Ang duha anaa karon gi-hospital arrest sa usa sa mga tambalanan sa Dakbayan sa Sugbo.

Wala pa masuta kun kinsa ang ilang hatdan sa maong shabu ug kun kinsa ang mga namusil ug unsa ilang motibo nga gipamusil nila ang duha.

Ang desk officer sa Minglanilla Police Station nga si Police Master Sergeant Junyl Ater miingon sa Banat News nga wala sa ilang listahan sa mga durugista ang duha.

Sa laing bahin,  pag-ambush sa duha ka mga lalaki diha sa Brgy. Dumlog sa Dakbayan sa Talisay  niadtong Biyernes sa hapon giingong may kalambigitan gihapon sa ilegal nga drugas.

Ang duha nailhan nga sila si Alvin Cueva, 44-anyos nga taga Sitio Rainbow Ville, Brgy. Pooc ug si Joel Generalao, 30-anyos nga taga Brgy. San Roque.

Matud ni PO3 Glenn Besande sa Talisay City Police Station nga nasikop ang duha tungod sa pagpamaligya og ilegal nga drugas.

Giingong gikan mipiyansa sa ilang kaso ang duha ug nanakay og taxi gikan sa Palace of Justice apan pag-abot sa nahisgutang lugar gibabagan sila sa duha ka wala mailhing mamumuno ug gipakanaug ang taxi driver ug ang duha ka kauban sa mga biktima.

Asoy pa ni Besande nga ang duha ra gyud ang tuyo sa mga armadong lalaki.Nakuha sa crime scene ang 18 ka basiyo sa bala ug usa ka bala sa .9mm.

Kasamtangan pang gikuha sa kapolisan ang mga testimonya sa mga nakakita aron mailhan ang mga nagpusil patay sa mga biktima. (Gabriel C. Bonjoc/IBM)(BANATNEWS)