66-anyos napaig sa sunog sa Tejero

CEBU, Philippines — Patay ug paig nang nakit-an niadtong Sabado ang lawas sa 66-anyos nga ginang nga nawala atol sa pag-ulbo sa sunog sa may Sitio Silangan 2, Barangay Tejero, Dakbayan sa Sugbo niadtong Biyernes  hapon.

Ang napaig nga lawas ni Lilian Intrampas, nakit-an sulod sa pansayan sa ilang panimalay.  Matud ni Cebu City Fire Marshall Chief Inspector Noel Nelson Ababon nga human sa sunog, gipangita si Intrampas apan wala kini igkita, hinungdan nga niadtong Sabado, gisusi ang panimalay niini ug didto nakit-an ang paig nga lawas niini sa iyang mga silingan.

Gitug-an ni Ababon nga padayon ang ilang imbestigasyon sa nahitabong sunog diin ilang ipatawag ang mga nakasaksi sa pag-ulbo ug ang tag-iya sa panimalay diin nagsugod ang kayo.

Sa pagkakaron ang mga nasunugan nga sobra sa gatos ka pamilya ang kasamtangang gipahiluna sa Tejero Sports Complex ug padayon silang nanawagan og hinabang ilabi na ang mga personal nga kagamitan kay wala silay halos nabitbit atol sa pag-ulbo sa sunog. (Rowena D. Capistrano/DILT)

Kadaugan sa Mactan sa mas gipalapdan nga Liberty Shrine

Ang hilabihan nga kainit  sa panahon wala gayud  makababag sa bagang duot sa katawhan aron sa pagsaksi sa reenactment sa Kadaugan sa Mactan niadtong miaging  Sabado, Abril 27  nga gipahimuslan usab sa mga sidewalk vendor pinaagi sa pagbaligya sa ilang bugnaw nga tubig, mga kawo ug mga payong.

Ang kapolisan sa Presinto 2 sa Lapu-Lapu City Police Office (LCPO) mibanabana gikan sa 10,000 ngadto sa 12,000 ka tawo ang misaksi sa maong tinuig nga kalihukan karong tuiga.

Hinuon  wala  gayud mapuno ang gipalapdan nga Liberty Shrine nga nahimutang sa Barangay Mactan human gituohan nga tungod usab sa naglagiting nga kainit sa panahon.

Ang kapin  sa usa ka ektaryang shrine, makasulod og 30,000 ngadto sa  40,000  sa gidaghanon sa tawo.

Si  Mayor  Paz Radaza  maoy nangulo  sa pag-abi-abi  sa mga dinapit nga bisita nga misaksi  sa pasundayag  nga naglakip  sa tsirman sa National Historical Commission of the Philippines (NHCP) nga si  Dr. Rene Escalante.

Namatikdan nga atol sa maong kalihukan, walay mga politiko nga  mipahimulos  sa pagpangampanya sa ilang kandidatura  gawas  lamang sa aktor nga si Dennis Padilla nga maoy gipadala ni senatoriable Bong Go.

Gawas kang Padilla, adunay ubang staff sa kandidato sa pagka senador ang nanghatag og mga giveaways sama sa paypay, ballers ug uban pa.

Sama sa naandan, gihugyawan sa mga sumasaksi ang gikaintapang reenactment sa panag-engkwentro sa Oponganong bayani nga si Lapu-Lapu ug ang langyaw nga si Ferdinand Magellan.

Maoy midala sa papel ni Lapu-Lapu karong tuiga si Derrick Monasterio sa GMA-7 ug gidala usab  sa papel ni Reyna Bulakna ang ABS- CBN  actress nga si  Myrtle Sarrosa. Ang laing Kapamilya nga aktor  nga si Mark Neumann maoy midala sa papel nga Magellan ug  ang mga Sugbuanong  grupo  sa mga eskrimador maoy nahimo nilang mga sakop nga nagtinigbasay sa daplin sa baybayon sa Brgy. Mactan (/DILT)(BANATNEWS)