EBs gipaubos sa refresher training

CEBU, Philippines – Human sa sunod-sunod nga training niadtong bulan sa  Marso kalabot sa mga responsibilidad ug trabaho alang sa May 13 midterm election ang mga electoral boards sa Probinsiya sa Sugbo nga mo-serve sa umaabot nga piniliay gipaubos na usab karon sa refresher training sa Commission on Elections (Comelec).

Matud ni Atty. Jerome Brillantes, acting election supervisor sa Probinsiya sa Sugbo nga  ang refresher training importante kini aron dili makalimot ang EBs sa operasyon.

Ang refresher training nagsugod kini niadtong Martes ug magpadayon hangtud ang tanan mapaubos sa maong training.

Gawas sa refresher training adunay final briefing sa EBs tulo ka adlaw sa dili pa ang Mayo 13.

Samtang nipahibalo usab ang Comelec nga kutob sa udto sa adlaw sa eleksiyon mamahimo nga maka-substitute sa kandidatora sa namatay nga kandidato ang mga kabanay niini.

Matud usab ni Brillantes nga kinahanglan nga pareho og apilyedo sa namatay ang mohulip niini.

Kini gumikan kay dili na mausab ang  balota ug dili usab makamugna og kalibog sa mga botante.

Ang botos nga makuha sa ngalan sa namatay nga kandidato nga naa na sa balota maadto sa nipuli kaniya.

Dugang ni Brillantes nga kinahanglan lang nga mo-file og certificate of candidacy ang mopuli aron adunay pormal nga dokumento nga na-record ang Comelec. (/BDB)(BANAT NEWS)