COSAP gisamuk-samok, gipamolitika?

CEBU, Philippines – Karon nga nagkaduol na ang May 13, 2019 National ug Local Elections, ang pangulo sa Cebu City Office for Substance Abuse Prevention (COSAP) nga si Garry Lao miapelar sa tanan nga dili iapil sa politika ang mga programa ug uban pang kalihukan ubos sa ilang buhatan. Kahinumduman nga isip kabahin sa pagpalig-on ug paghingusog sa COSAP sa ilang kampanya batok ilegal nga drugas, aduna silay mga programa nga giandam.

Usa na niini ang pagpahigayon nila og variety shows sa kabarangayan nga gisugdan sa miaging tuig ug ang pagtabang sa mga drug surrenderees nga gustong magbag-o human nahisalaag sa sayop nga dalan.

Apan adunay nadawat nga taho si Lao ug duna gyuy miadto sa iyang buhatan nga residente sa usa sa mga bukirang barangay sa siyudad nga gipakanselar ang variety show sa ilang barangay human kini gihulga. Mahitungod sa mga drug surrenderees, si Lao mihangyo sab nga dili pangayuan og lista sa tibuok nilang pamilya ang mga surrenderees.

Nakasulti si Lao niini human sa miaging adlaw, adunay miadto sa ilang buhatan ug miingon nga matud pa gipangayuan sila og lista sa ngalan sa ilang tibuok pamilya ug kon dili mohatag, adunay bati nga mahitabo kanila.

“Wala ko nituo ana mao na karon niuna lang ko og sulti nga ayaw lang i-apil-apil”, dugang ni Lao.

Nagkanayon si Lao nga ang maong report nga iyang nadawat, iyang i-verify sa kapolisan aron masuta kon unsa kini ka tinuod ug kinsay responsable niini.

Ang COSAP ug PNP adunay maayong relasyon ilabi na sa pag-monitor sa mga drug surrenderees ug sigon ni Lao, ang pagbisita sa kapolisan sa kabalayan sa mga drug surrenderees kabahin kini sa ilang programa. (/DILT)(BANAT NEWS)