Korean tourists giawhag nga mosunod sa balaod sa Pilipinas

CEBU, Philippines – Giawhag sa presidente sa Cebu Korean Association ang mga Korean national nga turista nga mosunod sa mga balaod sa Pilipinas.

“All Koreans coming to the Philippines should follow Philippine laws”, matud ni CKA president Charlie Cho atol sa gipahigayon nga 2019 Korean Community Security Conference on Safety Accidents Precautions kagahapon.

Si Cho nanghinaot usab nga ang mga Pilipino magpabilin nga mahigalaon ug maayo ang pagtagad ngadto sa mga Korean national.

Sa laing bahin, si Cho nagkanayon nga gawas nga makadani ang mga tourist spot sa Sugbo ang mga Korean national nangita kini og investment hub sama sa manufacturing ug industrial businesses sa Sugbo.

“This is due to good reputation of the Philippines of its highly-skilled and rich labor force. Korean investors looking at Cebu specifically for their plans of expanding outside their country”, matud ni Cho.

Gihisgutan ni Cho ang STX company nga usa ka Korean shipping building firm diin buot kining mobutang og planta sa Cebu ug gipanglantawan nga makahatag kini og liboan ka trabaho.

Gawas sa KEPCO (Korean Electric Company) nga aduna nay planta sa Siyudad sa Naga, gibutyag ni Cho nga adunay laing power company nga buot motukod og power plant sa Cebu.

Matud usab ni Cho nga ang Korea Water Resources nga adunay partnership deal sa San Miguel Corporation sa Manila buot usab nga mo-expand sa Cebu.

Gibutyag usab ni Cho nga ang reputasyon sa Cebu ngadto sa Korea dili lang kini tourists destination ug ESL (English as Second Language) site apan giisip usa kini nga playground sa mga Korean investor.

Sa pagka karon, adunay 20,000 ka Koreans ang nagpuyo ug nagtungha dinhi sa Cebu.

Gihangop usab sa mga sakop sa CKA ang presensiya sa bag-ong honorary Consul of Republic of Korea to Cebu nga si Oh Young Hun. (Ehda M. Dagooc/BDB)(BANAT NEWS)