668 ka mag-uuma sa Cebu City hatagan og hinabang
CEBU, Philippines — Giproseso na karon sa Cebu City Agriculture Department ang procurement sa agricultural inputs alang sa mga apektadong mag-uuma sa 28 ka bukirang barangay sa siyudad nga nagkantidad og P26.9 milyones.
Si City Agriculturist Apple Tribunalo nibutyag nga si Mayor Tomas Osmeña bag-ohay lang nipirma sa purchase order subay sa deklarasyon sa state of calamity sa tibuok siyudad gumikan sa epekto sa El Niño.
Sa niaging semana ang city council nihatag og pagtugot sa Cebu City Disaster Risk Reduction Management Office (CCDRRMO) sa paggamit sa pundo nga nagkantidad og P26.9 million aron pagtabang sa 668 ka apektadong mag-uuma.
“Right now, we are processing for the emergency procurement. Ang emergency procurement nato ni mayor, na approved na for the purchase of agricultural inputs, that’s around P26.9 million worth of agricultural inputs”, matud ni Tribunalo.
Ang maong agricultural inputs naglangkub sa rubberized hoses, knapsack sprayers ug drums.
Ang huwaw nakaapekto sa mga mag-uuma diin ang ilang mga pananom nangadaot.
Base sa consolidated report sa City Agriculture Department ang mga nangadaot nga mga pananom naglangkub sa lettuce, baguio beans, sweet corn, hot pepper, kamatis, talong, string beans, ug uban pa.
Samtang naghuwat sa agricultural inputs nga ma-apod-apod ang City Agriculture Department nitabang una sa mga mag-uuma pinaagi sa paghatag og mga ekipo sama sa drums, power sprayers ug uban pa.
Sa niaging buwan gigamit nila ang ilang annual budget nga nagkantidad og P12 milyones alang sa procurement sa maong mga items aron pagtabang sa mga mag-uuma sa bukirang barangay sa siyudad. (BANAT NEWS)
- Latest
