6,400 ka VCMs naabot na sa Sugbo

CEBU, Philippines — Naabot na sa Sugbo ang 6,400 ka vote counting machines (VCM) nga gamiton alang sa umaabot nga May 13, 2019 midterm election. Matud ni Atty. Jerome Brillantes, acting election supervisor sa Probinsiya sa Sugbo nga gipaabot pa nila ang laing hugna sa VCM karong adlawa.

Ang Probinsiya sa Sugbo adunay 6,716 ka clustered precincts ug samang gidaghanon usab sa VCM nga kinahanglan sa Probinsya sa Sugbo.

Ang unang niabot nga mga machine anaa karon sa LBC hub o bodega sa Mandaue ug gibantayan kini sa Special Weapon and Tactics (SWAT) team.

Ang Comelec mopahigayon kini og pagsusi sa maong mga machine pagsuta kon aduna bay guba o adunay dili mogana niini.

“We will inspect if sakto ba gyud ang VCM, mao ba gyud presintoha”, matud ni Brillantes. Matud usab ni Brillantes nga ang mga VCM dili ni pwede magkabayloay sa laing presinto sanglit “specified” kini sa presinto nga butangan niini.

Sa Mayo 10, gikatakda ang synchronized final testing ug sealing sa VCMs sa probinsiya.

Samtang gipaabot usab sa Comelec sa Probinsiya sa Sugbo nga sa uwahing semana sa buwan sa Abril o unang semana sa buwan sa Mayo maabot sa lalawigan ang mga balota alang sa umaabot nga piniliay.

“Ang balota automatically ma-distribute ngadto sa mga treasurer sa lungsod”, matud ni Brillantes.

Ang mga treasurer sa LGUs mao kini ang gitahasan pagsiguro nga luwas o walay mahitabo sa mga balota.

Si Brillantes nagkanayon nga inig abot sa mga balota susihon usab kini sa mga treasurer kon sakto ba ang gidaghanon sa mga niabot nga balota sa ilang lungsod. (BANAT NEWS)