Kahuot sa trapiko nunot sa NYD

CEBU, Philippines — Gilauman sa Cebu City Transportation Office (CCTO) ang kahuot sa dagan sa trapiko sa himuong prosesyon subay sa National Youth Day 2019 nga ipahigayon sa Siyudad sa Sugbo.

Sigon sa operations chief sa CCTO nga si Francisco Ouano, ang ilang buhatan nangandam na sa maong kalihukan nga gipaabot nga dagsaon sa libuan ka mga kabatan-onan lukop nasud.

Si Ouano miingon nga ang kahuot sa dagan sa trapiko hayan motumaw gikan sa udto sanglit ang prosesyon karong Miyerkules magsugod sa alas 5 sa hapon hangtod na sa alas 7 sa gabii.

Ang rota sa prosesyon magsugod sa Cebu City Sports Center, agi sa P. del Rosario St., right turn sa Osmeña Boulevard, right turn sa F. Gonsalez St., left turn sa Magallanes St., dayon sa Magellan’s Cross.

Nunot niini, giawhag ni Ouano ang mga motorista nga likayan ang pag-agi sa rota sa prosesyon aron dili matanggong sa trapik.

Gi-post sa CCTO sa ilang official Facebook account nga adunay temporary re-routing nga buhaton sa mga apektadong dalan.

Moabot sa 90 ka traffic enforcers ang ipakatap sa nahisgutang mga lugar aron mobantay sa dagan sa trapiko.

Giawhag ang mga motorista nga mosunod sa traffic scheme aron dili dakpon. (BANAT NEWS)