Red alert sa National Youth Day
CEBU, Philippines — Andam na ang mga organizers sa National Youth Day 2019 sa pagdawat sa dose mil ka mga batan-on gikan sa nagkadaiyang lugar sa nasud karong adlawa.
Si Cebu Archbishop Jose Palma miingon nga plastada na ang tanang nalambigit sa maong kalihukan sa pag-abi-abi sa mga kabatan-onan ug mapasalamaton siya sa tanang nagdumala alang sa kahapsay ug kalinaw sa NYD2019.
Malaumon ug maampuon ang arsobispo nga walay mga panghitabo nga motumaw samtang ipahigayon ang NYD sa Sugbo ug malingaw ang mga delegado sa giandam nga mga kalihukan.
Giawhag sa Arsobispo ang mga Sugbuanon nga makig-alayon usab alang sa kalampusan sa maong kalihukan.
Gibutyag usab sa arsobispo nga 25 ka mga obispo uban ang ang representante ni Pope Francis ang Papal Nuncio to the Philippines nga si Archbishop Gabriele Giordano Caccia ang motambong unya.
Samtang anaa na sa red alert status ang tanang kapolisan sa rehiyon siete alang sa pag-abot sa mga pilgrim sa National Youth Day 2019 sa Sugbo karong adlawa. Gisang-at na sa direktor sa Police Regional Office-7 nga si Police Brigadier General Debold Sinas ang alert status subay sa pag-abli sa lima ka adlawng kalihukan alang sa mga batan-on nga gi-host sa Archdiocese of Cebu.
Gipadayag ni Sinas nga wala silay na-monitor nga hulga sa seguridad sa maong kalihukan. Apan wala nila gisalikway ang posibilidad nga atakihon sa mga rebelde ang kalihukan susama sa nahitabo sa pagpamomba sa mga simbahan ug hotel didto sa Sri Lanka. “We will do our best to protect the pilgrims, actually we are planning to deploy more sniffing dogs in the area to help us monitor, but as of now no immediate threat is being monitored in Cebu,” sigon ni Sinas.
Kagahapon atol sa Task Force NYD 2019 executive briefing, gipakita ni Sinas ang ilang security preparation alang sa maong kalihukan diin liboan ka mga polis ug mga force multipliers ang ipakatap. (BANAT NEWS)
- Latest
